「嚇死人咩，個心離一離呀!」可能睇到啲相嘅第一刻都會忍唔住爆出汪明荃嘅金句，點解會有爸爸會畀自己一歲嘅女做啲咁危險嘅事架！為咗呃Like，竟然將個女放喺咁危險環境影相？
俗語有謂「耳聽三分假，眼看未為真」，大家放心，呢啲全部都係P圖嚟嘅。呢位來自愛爾蘭嘅爸爸叫Stephen Crowley，而圖片中嘅小朋友係佢歲半嘅女Hannah。身為設計師嘅Stephen 利用自己嘅Photoshop 功力，P出一系列嚇到大家腳仔軟嘅相。
Hannah 從出世就帶有罕有嘅先天免疫疾病，稱為血細胞淋巴細胞增生症(Hemophagocytic Lymphohistiocytosis，HLH)，係一種身體生成過多免疫細胞到會危及生命的缺陷疾病。龐大嘅醫藥費讓Stephen 不得不上網請求募款，同時Stephen 都希望借相片嚟提醒大家生命其實真係好脆弱，呼籲大家要珍惜眼前人。
可幸嘅係Hannah 最後得到德國一位匿名女富翁捐款協助下接受咗骨髓移植，病情大為好轉。從廣大2700萬名全球捐贈者只有三位嘅骨髓適合Hannah ，Stephen 呢啲驚人嘅相，希望可以提高意識，讓更多人加入骨髓捐贈者行列。
雖然Hannah 患有罕見病，但堅強嘅佢臉上總係掛住燦爛嘅笑容。Stephen 表示，雖然Hannah 出世頭一年失去咗好多快樂嘅時光，但隨住Hannah 逐漸康復，而家佢哋可以影好多相，可以做到好多正常家庭做嘅事。
圖片來源 : Instagram @ steecrowley
撰文 : Amber
