今年嘅真君大帝寶誕由4月8號去到12號，位置仍然喺青衣體育會球場。每年農曆三四月，青衣居民都會搭建大戲棚慶祝真君大帝寶誕同天后誕，戲棚除咗有粵劇演出，仲有幾十檔小食攤位，所以吸引咗好多市民慕名而來。咁到底邊個係真君大帝呢？點解青衣居民要大費周章慶祝呢？
真君大帝簡稱真君，本名吳剛厚，南宋廣東人。宋理宗年間，因協助朝廷對抗廣東一帶嘅海盜有功，深得粵東沿海一帶民眾稱頌，死後仲有人見到佢喺龍崗顯靈。當地居民奏報朝廷，宋帝就封佢為真君大帝啦～仲下詔各鄉建廟雕像供奉，慢慢廣東各地都知道有真君大帝，仲建廟奉祀，而佢聖誕就係農曆三月十五日。
香港只有一間真君廟，位於青衣楓樹窩路。一九一五年左右，一批海陸豐移民到香港青衣，並將鄉下嘅真君帶埋嚟，喺青衣設立神龕。八十年代，政府填海收地，信眾借搬遷到楓樹窩路現址之便，重修新廟，亦即係而家大家見到個間啦～嚟到香港之後，海陸豐人仍然堅守住佢地嘅傳統，每年都會舉辦真君大帝寶誕。
除咗真君廟，當時嘅海陸豐移民仲興建咗太陰娘娘廟同達摩祖師廟，另外仲有由水上人興建嘅大王伯公廟，全部都集中喺青衣鄉事委員會附近。
而喺慶祝真君誕之前，主辦方「青衣街坊聯合水陸各界」就會先到真君古廟請神，之後又到附近嘅太陰娘娘廟、達摩祖師廟同大王伯公廟請神，將十幾個神像排列喺青衣體育會球場嘅戲棚前面準備觀賞神功戲。呢幾間廟宇嘅信眾藉住真君誕維繫感情，亦令眾神同獲街坊供奉，令氣氛更加熱鬧～
真君誕完結後，4月19號就係天后誕，信眾會用返同一個戲棚慶祝。以前兩個神誕嘅主辦者曾經一齊慶祝，但之後因為意見不合而分開，所以而家佢地會用同一個戲棚嚟慳錢，但就由唔同人主辦～
真君大帝寶誕歷史悠久，掃街以外知多啲，人都醒啲啦～
圖片來源：網上
撰者：Kinnie
