如果你去旅行時，見到一個衣衫襤褸又冇著鞋嘅小朋友你會點做？有人會選擇視而不見，或者畀少少錢佢，不過呢位外國遊客卻選擇花時間帶小朋友去百貨公司，送一對全新嘅波鞋比佢。
日前菲律賓一間鞋舖嘅店員Ahyan Yerro 喺網上分享咗件好人好事。有一日臨收工時，有兩位客人前來購物，一位係外國遊客，而佢身旁卻係一位赤腳嘅小朋友。咦，點解個組合咁奇怪嘅！？
店員好奇一問，原來呢位好心遊客喺街頭見到呢位赤腳賣茉莉花嘅小朋友，佢實在唔忍心扮作視而不見，所以佢決定先買咗小朋友手上嘅茉莉花，再帶佢去百貨公司送對鞋畀佢。而呢一對鞋，竟然係呢位小朋友人生中第一對鞋。
第一次著鞋行路，小朋友明顯有啲唔習慣，但從小朋友嘅面上嘅表情可見佢真係好開心、好興奮，相信會係佢一生中最難忘嘅一日。店員深受感動，相當細心咁協助小朋友，仲畀咗個六折佢哋。
遊客帶完小朋友去買鞋後，之後帶佢去食快餐又買新衫比畀佢，真係人間有情啊！經過廣泛報導後，有媒體搵到呢位好心遊客，佢受訪時仲好謙虛咁表示自己只係盡一分綿力，希望自己嘅舉動可以啟發更多有心人去幫助更多需要幫助嘅人。
其實我哋已經好幸福架啦！生活喺香港呢個咁富裕嘅社會，擁有一對鞋係一件理所當然嘅事，但對菲律賓呢個小朋友嚟講卻係一個遙不可及嘅夢想。幸福並唔係必然，我哋真係要好好珍惜自己所擁有嘅一切啊！而且有能力去幫人已經係一種幸福，大家不仿從小事做起啦！
圖片來源：ABS-CBN News
撰文：Amber
