「唔該熄咗你嗰電話啦，我地而家喺嚟睇戲架～」歌都有得唱啦，去戲院睇戲都係想好好欣賞部電影姐，但偏偏就有好多無品觀眾阻住哂，搞到你錢又比咗，戲又睇唔到，真係得返個慘字。今日就同大家數爆觀眾無品行為，下次再遇到就掟呢篇文比佢睇，叫佢面壁思過！
1.遲入場
我都明白香港人好忙，但睇戲可唔可以準時少少呢～次次都比你擋住個營幕慢慢搵位，真係佛都有火呀！
2. 用電話
唔好以為自己用電話影響唔到人，喺咁黑嘅環境突然有啲咁光嘅物體，你估其他人真係盲架咩～講電話就仲衰，你又唔係李嘉誠一秒幾百萬上落，睇戲都係最多兩個幾鐘姐，睇完戲再覆都唔遲呀～
3. 傾計
呢個真係死忌！睇戲喺用眼睇，點解要講嘢呢？有啲人好鐘意一路睇一路討論劇情，「點解佢會死？」、「佢係好人定壞人?」、「快啲走啦仲等咩呀」……喂阿哥！咁鐘意傾返屋企慢慢傾啦，我都唔知聽你講野好定聽主角講野好～
4. 踢櫈
可能你對腳比較長啦，但都唔洗猛踢我張櫈架～有次睇鬼片睇到驚嚇位嗰陣，後面條友猛踼我張櫈，呢啲自帶4D效果真係唔洗客氣！
5. 食嘢
雖然戲院有賣食物，但太濃味同太嘈嘅嘢都盡量避免啦～尤其睇啲比較靜嘅戲，你啲膠袋同咀嚼聲好難聽唔到…
大家去戲院都想有個高質觀影環境，下次睇戲個陣控制下自己，做返個高質觀眾，咁你張戲飛錢先物有所值架～
圖片來源 : 網上
撰文 : Kinnie
