相信過年果幾日，屋企嘅長輩都會叫你要留意呢樣，留意果樣，唔好做呢樣又唔好做果樣咁。聽落好似好煩，但係禁忌呢回事，小編通常抱住「寧可信其有，不可信其無」嘅心態，盡量做到就做啦～以下小編同大家分享下聽過嘅新春禁忌啦！
#1過年唔動刀
媽媽每次過年前，都會提醒我地一家人要剪個靚髮過年，過年期間就唔可以剪架喇！因為剪頭髮或剃鬚都會截斷財氣架！菜刀同剪刀都係屬於凶器，所以盡量都唔好用，煮飯嘅食材就要喺前一天準備好喇。
#2初一唔打掃
相傳初一是聚福同聚財嘅開始，如果喺呢個時候掃地、倒垃圾等等，都代表會將福氣全部掃走晒架。不過如果真係要掃地，都仲有計嘅！就係一定要由外向內掃，防止將福氣掃出門口呀！
垃圾就要等到大年初五先倒，因為初一到初四的垃圾都係「財氣」，但到初五送窮日以後，垃圾就會變為「窮氣」。所以初五要將過年期間所有垃圾倒乾淨，俗稱「送窮出門」，據講可以帶黎好運架！
#3初一唔返娘家初三唔拜年
已經嫁咗嘅女，就等於潑出去嘅水，新年要返娘家，都要避免初一返，否則會令到娘家成年都行衰運架！ 初二返娘家拜年就岩晒喇，仲要記得買賀年禮物返去要「成雙」架！
另外初三赤口代表容易同人發生口角，為咗避免有唔開心嘅事，就盡量唔好初三周圍去拜年喇！
#4 新年買褲唔買鞋
新年期間，咩都講意頭，食要食髮菜蠔豉，喻意發財好市。買野方面都一樣，過年唔買鞋是常識吧，因為「唉唉」聲唔好聽！
不過就要買褲，因為同「富」字同音，未來一年都財富兼收！另外新年要收下把口，唔好講啲唔吉利嘅說話，例如係「死」、「病」、「輸」、 「窮」、「破」呢類字眼，記得要好好注意呀！
#5唔打爛嘢
「食野唔做野，做野打爛野」嘅朋友一到過年又有好好嘅理由唔做野喇！過年千祈唔好打爛野，因為咁樣代表破財破運！
如果真係唔好彩打爛咗野，記得要即刻講「歲歲平安」或者「落地開花富貴榮華」之類嘅吉利說話呀！
#6 唔煮新飯要著新衫
初一要食埋年三十晚留低嘅年夜飯，寓意舊年嘅食物食到今年都未食完，食魚都要記得食剩啲，象徵年年「有餘」！
同時過年要著新衫新鞋，代表萬象更新！唔少人仲會著紅色底底，希望全年都「鴻運當頭」呀！
講完呢啲習俗，大家準備好過年未啊？
圖片來源: 網上
撰文: Msrachel
