【電視撈飯年代】再黎十首值得一聽再聽的劇集主題曲

一首主題曲嘅成功，分分鐘可以令套劇秒速升上神枱，當年《歲月如歌》就係咁一炮而紅，可惜大台唔理網民嘅意見，第二輯轉歌......唔緊要，好歌一籮籮，今次小編再揀咗10首大家可能唔多記得，不過真心好聽嘅劇集主題曲，去片!

1. 《多一點》 — 離島特警 (1998年)
「來吧 關懷人多一點 不憂風波驟變~」除咗《一個人》、《歲月如歌》、《匯通天下》呢幾首歌之外，陳奕迅早期出道嘅時候亦曾經為大台嘅劇集唱主題曲。唔少人已經唔記得套劇或者歌名，不過一聽啲回憶就會返晒黎!最後果句「塵世也會被愛 頃刻感染」聽完心都甜埋!

2. 《對你 我永不放棄》— 先生貴姓 (1999年)
改編自英文版When I need you，羅嘉良同陳慧珊嘅深情對唱，「愛是愛是奧妙 永不可預期」，再諗起羅嘉良超破格演出扮演嘅Diana...噢!小編真的不行了

3. 《笑啦笑啦笑一笑》 — 布袋和尚 (1999年)
連Youtube都搵唔到，無辦法嘅情況下小編搵咗土豆網嘅版本，仲係當年嘅片頭黎! 林家棟、秦煌同陳妙瑛嘅精彩演唱，將佛家學說融入劇集之中，仲有布袋和尚同七大不得「貪嗔癡恨愛惡欲」同你講佛偈，再加上霑叔盞鬼唱法，聽完即刻「笑一笑」!

《布袋和尚》主題曲： http://www.tudou.com/programs/view/yr0evA0z5bQ

4. 《想飛》 — 勇往直前 (2000年)
「想飛 從平地一聲響徹天地再躍起」聽住馬仔馬浚偉嘅《想飛》，就諗起馬浚偉喺劇入面同馬王「小飛象」嘅奮鬥過程，聽完個人超HIGH熱血澎湃!

5. 《相愛無夢》— 西關大少 (2003年)
ChiLam喺大台唱嘅主題曲，除咗人人都記得嘅《祝君好》之外，其實仲有《相愛無夢》，當時播果陣都會跟住一齊唱「有心愛你卻愛不到 抱緊了你卻又未想終老」，仲有少女味勁濃嘅阿佘睇添~

6. 《與朋友共》— Yummy Yummy (2004年)
一開始鄭嘉穎嘅哼唱，有無勾起Yummy Yummy呢套劇嘅畫面呢? 當年四個都未係大台一線小生花旦，今日鄭嘉穎、林峯、楊怡同佘詩曼都已經係視帝視后，仲邊有可能同一套劇齊晒四個!? 呢首《與朋友共》可能你聽唔出阿佘同楊怡把聲，其實就係後面嘅英文和音!

7. 《調味人生》— 情迷黑森林 (2005年)
唔只戀愛自由式嘅《可疑密友》，Bobo陳文媛唱嘅「人生不只戀愛叫我開心 吃著純味巧克力亦很窩心」一樣好聽。唔知大家記唔記得第一集馬德鐘因為追仔所以訛稱自己有炸彈(其實係蛋糕)呢? (當年覺得胡杏兒同馬德鐘呢個組合好古怪，小編可能受到衝上雲霄嘅，覺得佢地背住Susan同Sam哥偷食，haha!)

8. 《幸而》— 亂世佳人 (2007年)
呢首同「杏兒」同音嘅《幸而》，唔少專業音樂人都大讚胡杏兒唱得好好，「未願拋開幸而有愛 原來精彩才能記載」 唔少網民都話胡杏兒自呢套劇之後囧樣漸現，不過呢套劇仲有超靚唐寧著旗袍:P

9. 《Let it flow》— 愛情全保 (2007年)
呢首由陳錦鴻同吳美珩主演嘅愛情全保，再加上Stephy超甜嘅聲唱出「Let it flow~ Let it flow~ I believe love will flow」，即刻令小編諗起呢兩個冤家狗咬狗骨，又要參加「愛情保險計劃」嘅搞笑劇情!

10. 《直覺》— 甜言蜜語 (2008年)
雖然前排俾人鬧到飛起，不過小編覺得欣宜把聲真係唔錯。如果你有睇過徐子珊同馬國明嘅《甜言蜜語》，就一定會聽過「誰會以真心的對我 如若說出口 可信麼」~ 唔講唔知，原來作曲嘅人係周永恆......

聽咗成日歌嘅小編，真係好想重睇返以前TVB嘅劇集，唔知你又記唔記得以上值得一聽再聽嘅歌同劇呢?

圖片來源：網上
撰文：陽光小毒毒