曾經接受過傳統雕刻訓練，同時又對甜品有份執著既英國甜點藝術家Sarah Hardy，將兩者結合仲製作左一系列逼真既朱古力雕塑，當中有好多都係你剝開之前，你都唔會發現佢係朱！古！力！絕對衝擊你既視覺神經！
首先出場既係一個血淋淋既心臟...
然後係一隻超像真既青蛙，你睇，係連身上面既花紋都超似
亦都有爬得好慢好慢既小蝸牛
講到花紋就一定唔少得既貝殼，每一部分都做得勁仔細
除左朱古力之外，佢都有整蛋糕架，不過唔少都係恐怖系列...
呢個骷髏頭骨只係基本級
有模仿喺手臂切一刀然後流血既蛋糕，血係紅莓醬黎既
呢個好得人驚既蛋糕係佢同朋友去完化妝舞會之後靈機一觸既共同創作，身體係用白朱古力雕出黎，血就係紅莓醬，而假髮同髮飾全部都係你出街都買到果啲
呢個全裸半身蛋糕係佢為喺倫敦時裝週遇到既客人特製既，本座心諗蛋糕款式原來都係Fashion既一種...又或者鐘意Fashion既人可能喜好都係比較特別...嗯
其實個人認為最恐怖係呢一個...雖然唔算太血腥，但一頭假髮同呢個妝容，硬係令人覺得好不安，個心仲會寒一寒...
最有好感就係呢個有少少教育意味既肺部蛋糕喇！因為左邊係健康既肺，右邊係一個有肺氣腫既肺，提醒大家如果唔好好保護你個肺就係右邊果個黎架喇！同埋呢個肺係血橙味，聽落都好似幾好食。
其實佢都好鐘意整唔同既人體部位，除左肺部，仲有女性既陰部。
堅！嘔！心！呢款Cupcake模仿緊一個傷口潰爛，然後生蟲既狀況...
相信大家已經開始有啲接受唔到，我地一齊睇返啲靚既中和下啦！其實佢識整靚既蛋糕架！
例如係呢隻海盜船～
電影入面既The Monster Book of Monsters 都整到出黎架！
有好可愛既蘑菇群～
好慵懶既兔仔蛋糕～
而最估你唔到既係，佢其實仲會整逢女仔見到都會心心眼既浪漫結婚蛋糕！
好夢幻之餘，細節位又係做得好好！
西式通常都會係玫瑰為主既花紋～
但作為一位外國人，佢連中式花紋都輕鬆駕馭
睇返啲靚野，感覺上好似無咁想嘔！不過如果你對啲驚嚇蛋糕好有興趣但屋企又有小朋友既話，都係忍下手盡量唔好買黎食喇，否則好易有童年陰影架，善哉善哉！
圖片來源: Sarah Hardy Official Site
撰文: 食家牟尼
