「Trash the dress」呢種風格嘅婚紗相係香港好少見，因為呢類風格要求新郎新娘著住禮服係水底、泥灘、廢墟呢啲地方影相，做成強烈嘅視覺對比又有另類美感。不過影完一次，婚紗禮服通常都要報銷，唔知你會唔會鐘意呢種style呢?
加拿大攝影師Dean Sanderson係著名攝影師，本來係主力拍攝商業產品或者雜誌相，不過多年前迷上墨西哥Riviera Maya天然水坑下嘅超靚景色，所以就改為轉做水底婚紗相攝影師。
身邊有啲魚仔游來游去，就反映出呢輯婚紗相同水底嘅世界完美融合。
海底世界既神秘又夢幻，新娘係水底之下隨意擺動都可以影得好靚，仲更加突顯本來婀娜多姿嘅身材！
而且係墨西哥Riviera Maya天然水坑之下，攝影師配合自然光作為配襯，令成張相本身嘅美感大大提升！
呢張新娘輕輕張開雙手，配合水坑外透入來嘅自然光，真係靚到dum一聲！
執子之手，與子偕老。比起平時影嘅婚紗相，係水底拍係咪有另一番味道呢?
水底下嘅新娘就好似美人魚咁，雪白婚紗再配上光同影嘅結合，仙氣十足。
如果你都想影咁靚嘅婚紗相，真係一啲都唔平架，因為影完婚紗禮服都要報銷，而且仲要專登去墨西哥天然水坑度影。不過人一世物一世，影輯水底婚紗相一定令你畢生難忘！
圖片來源：http://deansandersonweddings.com/
撰文：Sofia Lok
