| {youtube}8Vl9ZmUiWgk{/youtube} |
今年22歲嘅網絡作家劉晡照，筆名「做金庸的男人」喜歡人稱佢做金仔，雖然有呢個名，但佢嘅作品其實同金庸大相逕庭。佢之所以有「做金庸的男人」呢個名係因為細個時同媽媽講到希望自己成為一個作家，當時佢媽媽就同佢講：「做作家搵唔到食，有幾多個金庸啊？」
佢嘅作品並冇任何武俠成份，但就連系左好多香港時事。第一本出版成書嘅作品《是咁的 我嘅職業係幫人寫遺書》就係緣自於學生自殺事件，之後推出嘅作品《是咁的，我嘅職業係ptbf》，《是咁的，我嘅職業係動物傳心師》都加入當時社會熱話。雖然作品往往sad ending，但金仔希望透過自己文字傳遞到一啲溫暖同正能量俾讀書。例如《是咁的 我嘅職業係幫人寫遺書》就希望大家唔好輕易就幫一個自殺嘅人下負面評論，應該多關心身邊嘅人。
追夢的路是意想不到
講到點解開始寫作，原來一切緣自動畫。由細到大，金仔都好鍾意睇動漫，由佢床頭海報到屋企入面嘅公仔都唔難發現呢件事。係好細個果時，原來金仔係想做漫畫家，可惜因為自己畫畫天份唔高，加上香港畫畫空間好細，好快就打消呢個念頭。直至一日朋友借左本輕小說比佢，佢後來得知輕小說係日本經常被改成動畫，金仔就決定開始投身小說創作。
不怕世俗恥笑 用行動證明自己
提到「夢想」，金仔認為：「當你講出口，大家會笑你，覺得你不切實際嘅就係夢想。」金仔坦言由細到大作家呢個夢想都比人笑，但只係因為自己鐘意做，所以佢冇反駁冇出聲。相反，佢用行動去證明自己。由中學開始，金仔每年都會寫一兩部小說，更加會將作品寄到不同地方參加比賽，吸收經驗，令自己進步。對金仔而言，只要自己做出成績，就係對當日笑佢嘅人最好嘅反駁。
理想同現實嘅平衡
訪問期間提到網絡作家嘅發展，金仔覺得自己未有能力稱得上係「作家」。在金仔嘅定義，作家就係全職創作維生嘅人，依家嘅佢雖然有出書，但佢只係覺得自己係一個「作者」。佢係追尋理想嘅同時亦係現實有一份正職。「我都要生活，都要搵食。」係香港社會，金仔需要做到理想同現實嘅平衡。唔講唔知，金仔依家嘅工作係喺一間電影公司做編劇。同係文字上嘅創作，寫小說同做編劇對金仔而言有冇分別？金仔認為最大嘅分別係寫小說係個人創作，自由度大好多;而編劇就係團隊創作，雖然電影劇情發展佢有一定空間去寫，但亦要配合真實上嘅可行性，演員同其他相關嘅參於者。「電影有好多事唔係一個人可以決定到。我唔討厭編劇呢個工作，但未去到好鍾意。我始終鍾意寫小說多少少。但作為一個編劇，我都希望有一日會拎獎。可能講出口人地又會笑我。」無錯，金仔就係一個敢去發夢嘅人。
只有夢想嘅人係幼稚
金仔覺得要追夢，第一步當然係要有「夢」呢個諗頭。但有左呢個想法後夢想係唔會自己就成真。要夢想成真係需要你嘅行動力。只有夢想而冇行動嘅係永遠都追唔到夢。追夢嘅路亦都絕對唔易，有行動力都要有毅力。
敢發夢，敢去試，就係劉晡照–「做金庸的男人」。
採訪，拍攝，剪接：JJ Wong
撰文：JJ Wong
影片圖像：Samson Fung
