隨住科技進步，我地對手錶嘅要求唔再只係睇時間咁簡單，而係希望可以測埋身體狀況，甚至可以收發埋email，今日小編就嚴選3款性價比最高嘅智能手錶俾大家。
1. Fossil Q Hybrid系列
日日都要戴喺手，梗係要買返隻有外表有內涵架喇～今次Q Accomplice有大部份智能手錶都有嘅功能，例如監測睡眠同記錄每日步行步數等，仲新增咗相機自拍功能同可以播放音樂，只要連接Q Link，就可以控制手機影相同播音樂，咁成班朋友自拍嗰陣就唔洗再較電話倒數喇～
除咗功能吸引，外表都唔差架～一共有4款，每款都可以換錶帶，小編就最鐘意淺啡色皮革錶帶，貪佢夠斯文，返工出街都用得啊～
2. Skagen Connected Hybrid系列
Skagen價錢同功能都同Fossil差唔多，都可以遠距離搖控手機自拍同控制音樂播放，唯一分別就係佢有分女士同男士專屬系列，啱晒情侶一人一隻情侶錶～而且佢仲可以記錄步數、運動次數同飲水量，咁就可以兩個一齊做運動監察對方喇～
無女朋友都唔洗唔開心，Skagen有兩個鋼帶錶款係男士先有，鋼帶充分表現到男人嘅剛強同型啊！而且呢個系列嘅手錶內置壽命長達4至6個月嘅電池，無需充電，夠晒方便啊！
3. 華米Amazfit運動手錶
如果嫌以上兩款個樣唔夠運動型？咁不如試下Amazfit運動手錶喇～呢隻手錶內置4GB記憶體，可以儲存到大約500首歌，仲要防水防塵同有埋GPS加GLONASS雙星定位，令用家可以記錄運動時嘅路線，啱晒鐘意做運動嘅人～
最重要就係佢一千蚊都唔洗，勁抵玩啊！不過女小編就覺得佢外表仲有待改善，始終佢真係專門設計俾運動緊嘅人，外表一定比可以普通行街返工嘅手錶差。
圖片來源：網上
撰者: Kinnie
