日本有一個專俾人妻大討苦水嘅網站，其實只係一個好普通嘅討論區，但睇嚟會員都比較痴線，有人會詛咒老公；有啲人甚至會討論點殺死自己老公！咁憎自己老公點解仲要一齊啊！
有網民寫咗自己老公幾月幾號飲飲下酒嗰陣死咗，如果係正常人應該都會喺下面打RIP，唔好唔開心等等嘅說話。但係呢個網站嘅人竟然留言「恭喜」、「點解死嗰個唔係我老公」等等，實在太恐怖喇！
呢個網站近排就出咗實體書《老公死亡筆記簿》，集結咗網站大部份內容，仲將老公要死嘅原因分為5類，分別係「無法原諒老公出軌」、「無法同老公做愛」、「無法原諒老公暴力」、「要對老公復仇」同「總之老公同我去死」。呢本書宣傳標語係「買咗呢本書3日老公就死喇」，一出即刻大賣，仲上埋amazon親子家庭類第一位！
求其睇一頁都feel到人妻有幾憎自己老公！
-難得聽日你生日，不如變埋死忌喇。
-噚日用條友支牙刷清去水口，用浴巾擦浴室，咁啱見到隻蜘蛛屍體，就放埋喺佢枕頭袋。
-我連叫個男人做老公都唔想。
-每次睇意外新聞嗰陣都會祈禱下個係你。
-過期嘅茶入面放咗安眠藥。
-好想幫你按下火葬個掣。
睇完呢本書，我諗唔會再有人夠膽結婚……
資料來源：narinari，danna-shine
撰者：Kinnie
