《前度》播完後，ViuTV緊接其後播出黑色荒誕劇《賤民20》。以倒敘方式講3位市井之徒遇過咩事而成為賤人，題材偏鋒之餘，連講故事嘅手法都偏鋒，開播兩集，大部份網民都表示「睇唔明」。但第三集開始進入故事，有啲「眉目」，開始有啲好睇喎～
轉自網上，故事內容係講述三位主角：一個破咗產喺人生低谷嘅賤男人（王宗堯 飾），一個迷茫又渴求解脫嘅自作賤女人（吳凱昕 飾），同一個只係想委曲求存卑賤生活嘅市井男人（陳炳銓 飾），三個人走埋一齊，想炸爆個公廁宣洩一下，最後反而殺死咗自己。之後故仔再倒轉頭講返佢哋三位點解會變得咁賤。
每集包埋廣告播出30分鐘，第一集倒敘三位主角點樣唔小心炸死自己，咁就完咗啦。小編睇完就係「黑人問號」咁嘅樣....有網民表示只係睇咗頭5分鐘都唔知做乜...
之後播出第二集，分別講佢地遇到咩事變成「賤人」。睇完第二集，唔少網民都有種感覺，「我究竟睇咗啲咩」。
小編抱住對呢套劇嘅期望，好有耐性咁睇到第三集。噚晚播出第三集，終於開始進入故事，有少少「眉目」，尤其係「民間港姐」吳海昕嘅故事線，中學遇過咩事令佢決定要做賤人。故事比上兩集完整，起碼係有啲嘢睇。
▲第3集「民間港姐」吳海昕有多啲戲份啦～～著校服個look都幾清純tim~ (圖片來源：Instagram @kkday1122)
《賤民20》以片段式咁講故仔，基本上係以三位主角嘅對白、荒謬嘅生活去支撐成套劇。劇中對白表達出對呢個世界嘅不滿及憤怨，而且對白直接點出香港現實嘅荒謬。每講完一個故事，就會以打字幕嘅形式表達每節想講嘅題目。
暫時睇咗三集，對白未算突出，力度未至於一撃即中，拮中人心。頭兩集小編覺得每節完結嘅字幕唔太能夠帶出講故事之人想講嘅重點。首先，劇集主題係講呢三個賤人遇到咩事會變成賤人，但係頭兩集每節個故事內容就只係表現到現實有幾荒謬，但又帶唔出現實呢種荒謬感如何令遂漸逼到佢地成為賤人～但去到第三集，開始進入故事，每一節嘅故事完結個字幕起碼都同個故事線配合到。
開播三集已經好有gimmick，先係第二集有一幕係王宗堯想「後入」戲中飾演佢前妻嘅coffee，遲吓會有吳海昕與張敬仁同性之吻。
▲王宗堯想「後入」戲中飾演佢前妻嘅coffee
唔知呢套劇會否係「民間港姐」吳海昕嘅彈起之作？
圖片及資料來源：互聯網、https://lihkg.com/thread/378447/page/4
文：我左眼眉跳
