由蕭正楠同田蕊妮主演嘅無綫新劇《超時空男臣》將於星期一開播，好多網友都表示好期待啊！
曾打造過《大太監》、《公公出宮》等大熱劇集嘅監制羅永賢，帶住自己嘅御用班底拍攝出新劇《超時空男臣》。《超時空男臣》係繼03年《九五至尊》後另一套由古代穿越到現代嘅喜劇，將會緊接住《射鵰英雄傳》於周一8點半檔播出。
故事講述大將軍袁崇煥（蕭正楠飾）、才子左光斗（曹永廉飾）及小太監李進忠（何廣沛飾）受託護送太子妃（王君馨飾）入宮時意外由明朝穿越到現代世界。尋回太子妃時，三人被方惠芝（田蕊妮飾）欺騙而留喺酒樓打工，期間三人烏龍百出，鬧出不少笑話。
三位明朝人第一次見到甜筒時反應勁好笑，三人更一齊食同甜筒，展現出極度親近嘅「兄弟情」。
雖然蕭正楠與田蕊妮合作過咁多次，不過今次卻係兩人首次合作拍攝喜劇。再加埋曹永廉同何廣沛兩位兄弟，拍攝期間笑料百出，視后田蕊妮都應接不暇！而王君馨喺戲中會一人分飾兩角，落難於現代嘅明朝太子妃及女明星，並會同曹永廉發展感情線。
新劇開播在即，一眾演員相當落力宣傳，不過佢哋嘅宣傳方式都幾另類。曹永廉早前喺社交網站公開咗蕭正楠反串古裝女人嘅照片，更笑言如果劇集收視好，將會公開更多足以摧毀蕭正楠前途嘅核突相。
無綫通常穿越劇收視都會好啲，唔知今次收視又會點呢？
圖片來源：Instagram、Facebook、Internet
撰文：Amber
