4K高清劇《不懂撒嬌的女人》播放完畢後，2007年製作嘅《蘭花劫》將於5月29日九點半緊接播放。《蘭花劫》先後於2007及2008年喺海外及TVB收費頻道播出。做咗倉底劇十年，無綫官方回應時表示《蘭花劫》係無綫劇集片庫中嘅滄海遺珠。而家「重見天日」，到底呢套劇有咩過人之處呢？
無綫原先計劃播完《不懂撒嬌的女人》後，播出由黃智雯、袁偉豪和陳智燊主演嘅《三個女人一個「因」》，不過無綫最近決定轉為播放《蘭花劫》，《三個女人一個「因」》將會被抽起，原因未明。
2007年製作嘅《蘭花劫》由蘇玉華、田蕊妮和唐寧三位主演，係田蕊妮加盟TVB第一部作品，而當時未上位嘅胡定欣都有份出演，劇集以當年嘅卡士嚟講唔係咩大製作，不過絕對可以以劇本取勝！故事講述民初時失散三姊妹之間嘅恩仇愛恨，當中更有唔少圍繞女子監獄嘅生活情節，所以劇當年組去到香港第一所監獄—中環域多利監獄取景，真實感強烈。
十年人事幾番新，好多當時嘅演員都離開咗無綫，例如蘇玉華、唐寧及陳錦鴻。好多網友都表示好期待可以重新見返咁多已經離開無綫嘅好戲之人演出！雖然演員班底同劇本睇落都唔錯，不過有好多網友質疑10年前畫面質素，岩岩睇完套4K高清劇，而家叫我睇低清！？無綫就表示會以數碼技術優化聲畫喎！
對於劇集可以「重見天日」好多有份出演嘅演員都表示好高興，田蕊妮接受訪問時表示自己知道消息後第一個想法係好采自己冇整容，同時表示好期待睇番自己10年前嘅演技。而離巢4年嘅陳錦鴻接受訪問時則笑言大家個樣同十年前一樣冇變過。
圖片來源：Internet
撰文：Amber
