高街「鬼屋」
高街「鬼屋」即係指係1892部年興建的西營盤高街舊精神病院重建時留下嘅部份。2001年，政府決定拆卸建築物，只保留咗原有建築大麻石外牆及走廊，改建成西營盤社區綜合大樓。「鬼屋」被列為香港一級歷史建築，於2015年更被列為法定古蹟。
▲「鬼屋」外牆
▲「鬼屋」內嘅走廊保持原貌
據香港政府古物古蹟辦事處記載，舊精神病院原本係國家醫院嘅外籍護士宿舍。40年代，院舍東翼落成。去到1941年，因鄰近嘅域多利精神病院不敷應用，建築物唔再作員工宿舍之用，大樓改作女子精神病院。香港重光後，則恢復做女子精神病院。
1961年，青山精神病院落成，院舍便改作日間精神科門診部。1971年以後，建築物被閒置，果到屢次傳出鬧鬼傳聞。
以上為一本正經嘅官方記載嘅資料，而民間則流傳另外嘅說法。
二戰時，日軍佔領香港，將精神病院作為刑場，殺咗好多人。作為戰時行刑嘅地方，當然係「陰氣重、怨氣重」。另外，於病院前面的佐治五世公園曾經係亂葬崗，亦不時傳出靈異事件。
改作精神病院時，被送入去嘅精神病人都係被隔離，加上當時醫療技術唔太發達，好多病人入院通常都係「等死」。有說係70年代時，當時「鬼屋」已被閒置，但許多駕車人士經過此處時，不時會聽到慘叫聲。但有人則反駁話呢啲慘叫聲係由華人精神病院傳出。
另有網民係網上討論區留言指，「鬼屋」旁邊嘅斜坡經常發生交通意外。歷史因素再加上民間傳言，便令這幢歷史悠久的建築物成為「鬼故」／影視作品嘅素材啦。
南固臺
南固臺建於1918年，係一幢糅合中西建築風格的三層高紅磚豪宅，為香港永安百貨公司副司理杜澤文擁有。1945年，74歲嘅杜死於大宅內，留低女傭看守大宅，但後來女傭唔知咩原因，銷聲匿跡。
▲南固臺外牆係紅磚，故又稱紅屋。
▲南固臺嘅牌
後來香港淪陷，南固臺落入日軍手上。日軍係船街一帶設立慰安所，南固台亦被傳為日軍囚禁慰安婦嘅地方，好多慰安婦被日軍虐殺。
70年代，合和實業有意發展灣仔南部，收購咗南固台一帶地段，想保留大宅並作發展，擬建Mega Tower Hotel，但一路未落實，南固台一直被閒置，此後不時傳出鬧鬼傳聞。
據東方日報報道，2003年11月29日，有8名少男少女結伴到南固台「探險」，聲稱係陰暗嘅樓梯間見到一個黑影，其中3名女生疑「鬼上身」，齊聲表示： 「 我要返上去，佢 （ 鬼 影 ）好掛住我！」，其中1名女生更變咗男聲謂：「你跟我返上去！」，同行友人立即制止，4人騎於佢身上，將佢按於地上，但果女生突然變得力大無窮，輕易掙脫，最後驚動街坊報警，警員將佢制止。有傳當時制服果名少女嘅警員謂，見到少女眼睛係綠色，非常恐怖。
2015年，合和實業再次提出改建計劃，擬將南固台改為証婚場地，無證婚活動時，則開放南固台及其花園平台俾公眾。
聖璐琦書院
位於南固臺對面，天井型設計，校內無操場，學生要到天台上體育課。後來校方無交代原因，突然禁止師生再去天台，唔少鬧鬼傳聞開始流傳。
▲己被閒置嘅聖路琦書院
▲書院附近嘅樓梯
有網民於個人網誌寫道，係03年少男少女係南固臺探險疑鬧鬼後，同友人到南固臺外望吓，順便到隔鄰嘅聖璐琦書院睇睇。
當網民走到聖璐琦書院門前嘅樓梯級上時，突然聽到一把男聲說:「 妳們唔應該那麼好奇!」佢聽到呢句說話後，發現地上突然多咗好多溪錢，兩人立即轉身走人，回頭再睇書院，吹起陣陣陰風。
返到鬧市後，友人告知佢係同一時間，亦聽到一把男聲謂：「好了夠啦！」而且友人嘅腳唔知點解，唔能夠上樓梯。
港島區咁多「鬼故」，其實都係歷史因素，加之流傳鬼故嘅地方有齊鬼故「元素」，建築物歷史悠久、被廢棄閒置、戰時曾有人枉死，令港島區成為許多「鬼故」、鬼怪作品取材嘅素材啦～
圖片及資料來源：互聯網
文：看更
