韓妝帶起的雙色唇膏風潮，近期已經吹到歐美品牌。繼benefit、MAYBELLINE、YSL後，Givenchy 將於2017年下半年推出雙色唇膏系列，相信推出時一定會掀起一股搶購熱潮！
花瓣唇、咬唇妝已經hit咗幾季，熱度依然不減！雙色唇膏勝在易上手，塗抹簡單方便，手殘都可以畫出咬唇效果。
Givenchy 呢個最新雙色唇膏系列名為「Le Rouge Sculpt」，深色處用於打造豐盈飽滿嘅唇形輪廓，淺色處則畫出柔和嘅雙色效果，而且水滴形尖端讓妳輕易畫出唇線筆般嘅俐落效果。整個系列一共有五種配色，由少女粉紅色調到性感火辣嘅鮮紅色調都有，適合不同膚色嘅朋友，其中最特別嘅就係鮮紅配黑色！雙色唇膏色澤鮮明可以徹底遮蓋唇色，而且滋潤度高，塗抹喺唇上非常滑順。
唇膏外型同過往推出過唇膏款式相差唔大，都係以型格又奢華嘅黑色小羊皮搭配銀色金屬窩釘管身，一貫其品牌嘅「暗黑浪漫」風格。
系列將於8月喺美國推出，售價為美金$38（稅前港幣約$297），而香港有傳將於2017年秋冬季推出，大家要密切留意官方消息喇！
圖片來源：Refinery29
撰文：Amber
