芫荽熱潮已經去到失控嘅地步，由最初嘅芫荽味薯片到而家連芫荽味千層蛋糕都有。日本最近更有公司推出芫荽味入浴劑！浸完浴成身充滿住濃濃嘅芫荽味，相信一眾芫茜迷會為之著迷！
日本雜貨店Village Vanguard 上年10月1推出過「居酒屋」入浴劑，整個系列包括味噌湯、拉麵、火鍋、牛丼、炒麵同咖喱飯等口味，推出過後成為日本熱話，至今賣出超過6萬包。
見反應咁好，該公司最近推出第二波嘅「居酒屋」入浴劑，全新6種口味有芫荽、啤酒、Pizza、燒肉、枝豆同煎餃子口味，每包售價324日圓（港幣約$23）。官方仲特別聲明，話呢啲只係浸浴用，千奇唔好拎去食啊！大家沖完涼一定「香噴噴」啊，唔知會唔會愈浸愈餓呢？
大家對芫荽愛恨分明，如果唔鐘意芫荽嘅朋友要浸住真係喊出嚟啊！
網友對呢個系列嘅入浴劑反應兩極，有大膽嘅網友表示係「吃貨必備」，話好特別好想試；不過同時都有好多網友覺得太另類接受唔到。
小編就唔敢試喇，不過咁特別嘅入浴劑，用嚟做手信一流啊！
圖片來源：www.village-v.co.jp
撰文：Amber
