大家成日都話日本人有創意，創意力同幻想真係會嚇大家一跳。日本扭蛋無奇不有，日前有網友喺名古屋發現呢個最奇怪嘅扭蛋，扭情信！簡直係毒L FF恩物！
只需200日圓（約HK$13.8）就可以扭出一封人手親自寫出嘅情信，由Kiki（きき）寫出情信，情信嘅故事設定係一位名為Kiki（きき）嘅高中女生寫畀坐格離枱嘅你，真實度極高！
係我啊！Kiki啊！坐你格離嗰個呢！
好多謝你借隻CD畀我。原來我哋嘅喜好好相似架！你推介嗰隊Band我聽咗成日冇停過！我真係好鐘意啊(><) ♪\
我聽講話佢哋就嚟會開演唱會。我好想去啊，不過自己去又好孤獨咁，你會唔會同我去啊？？
如果你唔想去都完全冇問題架！
不過，如果你想一齊去，可能我哋可以一齊渡過好快樂嘅時光！因為只係喺學校傾計，返到屋企後其實我成日都有好多嘢想同你講。所以或者我哋一齊做多啲其他嘢，唔單只睇演唱會，仲可以去唱K，或者放學去食嘢都可以！
我有好多嘢想同你講。
你聽日覆我啊。
啊係，聽日記得帶書返學啊！
我唔會再借畀你架啦！
Kiki
喂~點解你唔聽我電話啊？
我等咗你真~係好耐。
我真係好鐘意你架...你咁對我我真係好寂寞....
當我見唔到你時，我成個腦都係你！！
同埋，我認真，我好想成日喺你身邊。
我係唯一一個喺你身邊嘅人，係咪？
我只屬於你❤你都係只屬於我❤
我唔會畀你走架，OK？
唔單只係喺Line...
我想成日喺你身邊。
可以做啲咩令你只係屬於我？
唔好唔理我。要成日望住我。
無論朝早、晏就、夜晚，定訓教都要望住我，OK？
我愛你。你愛我嗎？愛嗎？
我今日只係諗住你。
Kiki
點解封情信愈嚟愈怪嘅......睇到我有啲心寒.....故事仲未完架！
點解你唔覆我Line？
你「已閱」我個message前30分鐘你做緊咩？
你隔咗3個鐘先覆我message，你做緊咩？
你只係send emoji我唔明白架。
我真係好擔心你，所以我去咗你屋企，不過冇著燈。
你去咗邊？你係咪同人去街？
我返工都好忙架，但我都有畀你知道我去咗邊。
我鐘意你，所以我畀晒所有時間你是常識吧！？
每日返工時我成日都諗住你真係會令我分心。
你係咪都係成日諗住我？
請盡快回覆。
Kiki
相信所有人收到都係驚多過開心。Kiki 冷靜啲，大家係咪有誤會啊？
當大家以係好pure好true嘅情信，點知啲信愈睇愈似恐嚇信，難怪日本咁多網友話可以扭嚟整蠱朋友啦！而且有網友大讚呢幾封信好高質，200日元就有手寫情信真係好抵！
圖片來源：Twitter @higebozu72
撰文：Amber
