【電影系列】本周上映新戲（27/4-3/5）

今個星期嘅新戲咩類型都有，梗有一套啱你睇！

1. 《春嬌救志明》（香港）
2010年開始嘅故事，去到2017年已經第3套。春嬌同志明一眨眼已步入 7 年之癢感情期限，可唔可以跨得過去呢？我地仲有無機會繼續睇佢地嘅愛情故事呢？

2. 《銀河守護隊2》（美國）
《銀河守護隊2》貫切其玩嘢抵死風格，一班「非一般超級英雄」將繼續至激宇宙大冒險！佢哋今次將會遇到身份神秘、外號為「生命恆星」嘅壹高(Ego)，更發現咗足以挑戰整個宇宙安危嘅重大陰謀，究竟佢哋點樣可以再次保衛宇宙呢？《銀河守護隊2》喺IMDb有成8.5分，評價真係唔錯架！

3. 《禁斷之百合》（日本）
睇戲名都知道套戲係講女同志間的情慾性愛，突然有個男人加入，呢段複雜嘅三人關係又會變成點呢？剩係睇預告都已經熱血沸騰，到時入場睇一定會不停嘩嘩聲，如果你自問接受唔到太大膽嘅性愛場面，咁就真係唔好晒錢入去睇喇～

4. 《你還會在嗎》（南韓）
改編法國近年最暢銷小說家Guillaume Musso 嘅作品，簡單嚟講就係時空穿越愛情電影，醫生秀賢患上絕症，但仍對30 年前逝世嘅女友念念不忘，之後佢有機會回到過去，但就要面對蝴蝶效應。「觸不到的戀人，守候餘生，只為與你重遇」，淒美嘅愛情故事，鐘意感人愛情電影嘅話一定要睇！

5. 《我的失常日記》（美國）
剩係因為Chloë Grace Moretz都已經要入場喇～主角一大學畢業就可以從事夢寐以求嘅記者工作，仲好快得到重用，加上同音樂人蜜運中，事業愛情兩得意。但主角突然患上久久未癒嘅感冒，開始變得善忘，更開始出現幻聽幻覺，甚至癲癇症狀……父母陪佢四處求醫就無人能斷症。究竟係咩令到主角變成咁呢？

6《伊朗式遷居》（伊朗）
榮獲第89屆奧斯卡金像獎最佳外語片，導演之前嘅《伊朗式分居》同《伊朗式離婚》都大受好評，今次故事係講一對年輕夫婦搬去一個空置公寓，點知就係惡夢嘅開始。溫馨提示，導演嘅作品節奏比較慢，記住瞓夠先好入場睇，到時miss咗啲情節就唔好喇～

今個星期咁多好戲，大家記住同朋友夾定時間買飛喇～

圖片來源：網上
撰者：Kinnie