其實，養狗同揾伴侶一樣，都係相愛容易相處難。唔想帶咗一隻外表可愛嘅狗番屋企先發現大家唔啱key？等小編幫你夾下時辰八字，睇下你同隻狗嘅性格夾唔夾啦！今次就講下活潑好動嘅你同邊隻狗夾！
1. 哥基
外表好可愛，好有正能量嘅哥基，真係會令人不禁一見到佢就想抱起佢，帶佢番屋企。停！！！首先你要知道，哥基係一隻能量爆燈嘅狗仔。雖然佢隻腳好短，但佢其實係一隻好有運動細胞嘅動物。仲有佢地天生聰明，如果你本身唔係幾醒嘅人，我勸你都係唔好養哥基，就係因為佢太聰明所以如果你蠢少少佢會反坐咗你嘅王位，而你做番佢嘅奴隸...
2. 傑克羅素犬
傑克羅素犬做BB嘅時候，真係好打耳架！而佢呢種係英格蘭南部傳過黎嘅獵犬，係完全唔會有攰嘅時候。但佢地又唔係話可以做好多激烈運動架喎，做下啲輕鬆啲嘅慢跑係同佢相處最佳活動。
3. 拉布拉多犬
鐘意去沙灘玩下水嘅你，無乜攻擊性嘅大型犬拉布拉多犬可能係你嘅選擇。佢地嘅能量來自做一啲佢地同你都喜愛嘅活動。佢地好容易去訓練，得閒帶拉布拉多去游下水，佢一定樂而忘返！
4. 澳洲牧羊犬
雖然佢個名叫澳洲牧羊犬，但其實佢地嘅原產地係美國，而且佢地係需要好多好多運動，始終人地天生用黎放羊嘅，活動嘅能量好多，如果你係果啲鐘意留係屋企只係識攬住佢同你女朋友，sorry，佢並唔係你嘅第一選擇！
5. 威斯拉犬
佢地個樣雖然唔係平凡人中覺得最得意嘅品種，但講真，如果係要一齊生活嘅話，性格係最重要嘅。如果你鐘意長跑，做啲比較長時間嘅運動，威斯拉犬就比較適合你啦。
6. 雪橇犬
香港天氣暖嘅日子都多，不過小編都見過有人拖著隻雪橇喺公園散步。雪橇本身鐘意係凍嘅天氣生活，佢地凍嘅時候跑呀跑，可能仲跑得快啲。不過佢地嘅性格都比較固執，所以如果你真係想佢跟住你指示做野，你真係要有啲耐性教佢、訓練佢。
7. 米格魯
米格魯天生好活潑，又溫馴，佢地需要好多運動量，係有時八八掛掛啲，成日都用佢個鼻聞呢聞路。
8. 貴婦狗
貴婦狗真係鐘意跳跳扎扎，佢地係一個好好嘅伴同你一齊做少少運動，可以行下少少路，不過小編自己覺得呢個品種有時都幾有性格、好似公主王子，如果你自認係一個國王或者皇后，貴婦絕對係你嘅選擇。
圖片來源: 網上
撰文: Gloria Leung
