小編日日返工放工都聞到陣陣魚蛋味，好鬼香。香港有咁多間賣魚蛋嘅舖頭，你又試過幾多間呢？
1. 林記小食
地址：紅磡差館里21號
呢間嘅魚蛋犀利啦，佢嘅魚蛋醬絕對要試下。佢加咗以前香港小販賣魚蛋嘅獨門秘方，包括有蠔油、老抽、八角同埋咖哩混埋哂嘅醬一齊煮啲魚蛋，超入味！味道滿分！
2. 強記小食
地址：葵芳好爵中心62號地下
有網民認為呢間魚蛋嘅醬汁係世界級，但老實講呢個真係見仁見智。魚蛋有魚蛋味，但普普通通。
3. 陳記魚蛋
地址：深水埗欽州街114號地舖
呢間小編食過返尋味，仲要喺荃灣、紅磡、北角都有佢嘅分店。佢嘅特色就係佢嘅醬汁，當中嘅選擇包括有小小辣、小辣同大辣嘅魚蛋醬。佢地嘅醬偏向甜甜地，沙茶醬嘅感覺。
4. 通達食店
地址：油麻地碧街48號地下
聽說呢間魚蛋嘅特色係加咗湖南同四川辣粉，不過你食唔食到就靠你味蕾啦！
5. 文記果汁食品
地址：亞皆老街83號先達廣場地下G2至G3號舖
佢出名嘅魚蛋主要係辣魚蛋，重口味既你一定要試，食完記得同情人咀咀，包佢都感受到辣魚蛋俾你嘅餘韻。
6. 阿媽豆腐花
地址：旺角道30-36號寶安大廈地下D3舖
除咗用咖哩汁煮既魚蛋好食之外，佢地另外好食既有陳皮魚蛋。勁彈牙，超好食！
7. 龍津美食
地址：旺角道32號
好多人都去過呢度食過魚蛋，但知道有啲網民對呢間嘅魚蛋評價麻麻地，話啲魚蛋比較粉，唔夠彈。但其他小食算OK。唔知你試完呢間嘅魚蛋會唔會有同一個感覺呢？
8. 輝記小食
地址：灣仔天樂里9-17號地下
呢間嘅魚蛋係超級煙靭，辣魚蛋比較上辣味輕啲。
9. 甘永泰魚蛋
地址：長洲新興街106號地下
長洲大魚蛋，喺長洲必吃食物！無醬汁但已經能夠將魚蛋提升到另一層次。啖啖肉，小編最愛。
圖片來源: 網上
撰文: Gloria Leung
