由番學到番工，食個晏通常都出街食！可能大個咗消耗啲脂肪比較慢，近排發現身型已番唔到轉頭(嗚嗚嗚...)。 所以，我決定研究簡單午餐食譜，希望可以懶懶地整個飯盒，既快捷又方便！
拿拿聲搞掂 之 15分鐘整好鰻魚飯
材料: 一條鰻魚、幾舊雞肶菇、幾條蘆筍、隻雞剛剛生完嘅蛋、隔夜飯、壽司醋
做法:
1. 將鰻魚放入去焗爐用180℃加熱10分鐘，將雞肶菇又放入焗爐用180℃焗3分鐘，各拎出黎再切到細細塊就OK。
2. 烚咗啲蘆筍，切細細塊。
3. 加啲壽司醋落去整熱咗既隔夜/剛剛煮好嘅白飯，撈下佢，放入飯盒裡面。
4. 打散啲蛋，落少少油去鑊度，油熱到咁上下將蛋液炒成散蛋，再鋪喺白飯上。
5. 鋪番剛剛整完條鰻魚、雞肶菇 同 蘆筍，搞掂！
懶人手作 之 5分鐘搞掂飯糰三文治
材料: 一個充滿牛油味嘅牛油果、紫菜一兩塊、好有肉味嘅午餐肉、隔夜飯
做法:
1. 牛油果切片，將午餐肉切片再煎香，雞蛋煎熬。
2. 拎一張保鮮紙，放上紫菜同白飯，壓實。
3. 放上牛油果、午餐肉或其他自己鐘意嘅材料。
4. 提起四角向內摺，然後壓實。用保鮮紙緊緊包住裡面定型，搞掂！
唔怕有口氣 之 日式咖喱便當
材料: 薯仔、紅蘿白、洋蔥、乜肉都得、咖喱粉、隔夜飯
做法:
1. 將薯仔同紅蘿白洗乾淨，將洋蔥切碎，將肉切片。
2. 將油加在鑊中，加熱，再放洋蔥碎炒香。
3. 再加薯仔同紅蘿白繼續炒。
4. 加水炆5分鐘，再加咖喱粉煮，煮埋個飯，搞掂！
番住工打邊爐 之 韓式泡菜火鍋飯盒
材料: 清湯、泡菜、芽菜、高麗菜、蛋、火鍋材料、隔夜飯
做法:
1. 整熱清湯，加入韓式泡菜同芽菜，加少少鹽，整五分鐘左右。
2. 再依次序加高麗菜，你想加既火鍋材料，最後打入蛋1隻，再放入保溫飯盒。
3. 另外煮好飯放係另一個盒度，又搞掂！
係咪好簡單呢，快啲跟住食譜一齊整啦！;)
圖片來源: 網上
撰文: Gloria Leung
