呢位俄羅斯媽媽叫Elena Kirilenko雖然平日湊住三個仔已經好攰，但係佢真係一刻都唔浪費，趁空閒時間按買家要求整咗唔少手工迷你BB出黎，一齊睇下佢地有幾生鬼得意啦！
你睇下呢個小妹妹，嘟起個嘴撓埋對手好似嬲爆爆咁，但睇真啲對腳著住對唔啱size嘅鞋，就好似偷咗大人對鞋黎著咁呀～
呢啲迷你寶寶細細粒，只有半隻手掌大架咋～
每一隻嘅細節位都做得好足架，呢個係小丑寶寶，當然就唔少得個紅鼻仔啦！
寶寶全個身體都係用聚合物黏土黎整，其餘配飾就視乎係咩而用唔同物料去整～例如冷帽就當然係用冷啦～
呢個寶寶嘅媽媽一定好鐘意花，先會叫Elena 整到佢全身都係花~
呢個就一定係懶訓豬，就算喺地下爬緊都係訓覺的節奏～
呢個寶寶似係住喺森林或者農村，睇下佢同豬仔青蛙相處得幾融洽！
呢個係安睡寶寶，最特別係佢係訓喺一個真正嘅蛋殼入面架。望住佢個訓覺樣都覺得好冧豬呀！
呢個一定係好為食嘅寶寶，見佢揸實隻匙羹唔放手係咁舔就知啦～
係咪天下BB 大部分都係為食嘅呢？你睇下，又一個喇～
仲有第三個呀～定係其實係啲媽媽好想保留佢地食野個得意樣，所以都係訂製寶寶嘅食相呢？
呢個少少鬥雞，加上圓碌碌嘅包包面，肥嘟嘟嘅雙下巴同埋起碼有C Cup 嘅咪咪，小編一睇就爆笑喇！
呢個超級大鼻寶寶，應該會係個善良人，因為聽老一輩講，「鼻頭好有肉，內心就無毒」嘛！
呢個根本係聖誕節嘅時候，比媽媽著到成身聖誕老人裝，然後迫你企定定同狗狗影相影十萬張嘅感覺！
呢個唔通係選美冠軍？但點解...係攞住隻匙羹嘅？
最後，當然唔少得寶寶指定動作- 食手指！
小編真係好想有一隻，但仔又未生，而且重點係...一隻都賣好貴呀！平均一隻要二百幾，甚至三百蚊美金！比你又會唔會買返隻擺呢？
圖片來源: livemaster
撰文: Msrachel
