心形控女生要注意喇！日本山口縣嘅一家老店「光浦釀造」推出一款超治愈嘅「漂浮心形檸檬茶包」(Float Lemon Tea)，一片片心形的檸檬，令你重拾初戀感覺。
茶包附上的心形檸檬，漂浮喺茶面，等待同愛人相遇，真係浪漫到暈呀！
開店150年嘅「光浦釀造」，原是一家出產味噌同醬油一類嘅傳統調味料嘅老店，後嚟先開始製作水果飲料。『漂浮心形檸檬茶包』推出後大受歡迎，喺日本超高人氣！
紅茶裡浮著一片心形檸檬，令整個下午茶增添趣味！
將正在生長嘅檸檬放入心形模具裡面等佢慢慢成長，一段時間之後就會變成心形架喇！熟左之後再經過乾燥處理，心形檸檬片就完成啦！
檸檬片經過乾燥處理後，去除咗苦澀味。好多心呀！睇到小編心心眼！
幸福的下午茶時光！
IG上之所以有咁多人大晒「漂浮心形檸檬茶」，除左佢勁可愛之外，仲係因為佢十分難得！事關呢個茶包唔係想買就可以買到，係以抽籤形式出售，想買的話，要提前一個月到官網登記報名，抽中先有得買！你話幾巴閉！
由於「茶包」非常搶手，所以每人每次限定購買最多三盒（每盒有3 Set心形檸檬茶包），三盒合共864円（約57港元）。小編建議情人節送俾另一半，一定甜到漏！
「漂浮心形檸檬茶」共有三種口味，分別係月ヶ瀬紅茶、出雲紅茶、宮崎五ヶ瀬紅茶，都係產自日本當地。各位想碰碰運氣，可到官網訂購：http://mitsuura.jp/
撰文：Irene Leung
