話咁快又到年尾，數下手指今年唔少韓劇都擁有超高人氣，連帶主角們都變成2016年既大勢演員啊！一齊睇下小編精選啦～
1. 池晟
今年繼續食住2015年《Kill Me Heal Me》個勢，同惠利一齊出演戲子！同李寶英生左個乖乖女既池晟，依然充滿魅力，真係電暈唔少迷妹架! 今年佢仲憑《Kill Me Heal Me》橫掃各大頒獎禮既最佳男演員添呀！
2. 惠利 @Girl's Day
提起池晟又點能夠唔提Girl's Day既惠利呢？惠利上年憑《請回答!1988》一劇爆紅攞左唔少新演員獎之後，今年就同池晟合作拍左《戲子》，演技同樣備受肯定！除此之外廣告代言不斷更加令佢超越秀智，成為新一代百億少女！
3. 柳俊烈
講到今年大勢既又點少得佢柳俊烈呢～2016年簡直是醜出新角度，憑紥實演技獲得多個新演員獎！有醜帥之稱既佢雖然樣子唔係最討好，但係唔知點解會越睇越順眼～
今年同黃靜茵合作既《好運羅曼史》，令佢演技再受肯定，代表陷入戀愛果時個傻笑樣真係可愛到令小編都忍唔住笑啊！
4. 金智媛
2016年！最轟動韓劇點可以無《太陽的後裔》份呢？劇入面四位主角都因而爆紅！當中有呢位靚女金智媛！廣告代言停不了之餘，憑劇入面超亮眼既演出，被封最強女二！
5. 晉久
講完智媛點可以唔提晉久呢？《太陽的後裔》令晉久出道１３年後，第一次感受到走紅既滋味，得到觀眾肯定之餘，更加令佢演出機會多左好多，仲攞到演技獎啊！
最近佢仲迎接左屋企第二個小寶貝，真係事業家庭兩得意！
6. 宋慧喬
凍齡女神宋慧喬早喺浪漫滿屋既年代，憑活潑演出同純天然靚樣已經紅遍亞洲，但今年演出《太陽的後裔》，再度成為佢既代表作！同拍檔宋仲基更加係國民心中既最佳情侶CP！
7. 宋仲基
係喇就係佢喇！仲基OPPA憑《太陽的後裔》一劇，以及平時健康又陽光既形象，俘虜大批少女心，成為「亞洲男神」！2016年廣告代言接到停唔到，喺韓國可以話係無處不在，紅到發紫啊！
8. 全智賢
年頭有宋慧喬，黎到年尾就有另一位凍齡天后全智賢，產後同李敏鎬合作推出新劇《藍色海洋的傳說》，收視於同時段稱霸，同時海外收視都係一樣高，就算生完仔顏值同身材一樣咁頂級！
9. 孔劉
《藍色海洋的傳說》雖然收視好好，但係臨尾殺出一個程咬金！就係近期熱播，由孔劉同金高恩主演既《鬼怪》！
孔劉今年先有《屍殺列車》票房大賣令更多人認識佢，之後又再有大熱劇《鬼怪》，仲唔係2016大勢演員？
10. 金高恩
金高恩憑上年既《奶酪陷阱》知名度同人氣都急升，最近喺熱播既《鬼怪》入面做女主角，演技生動大獲好評，更加掀起左一股單眼皮熱潮，唔少女仔竟然去到整容醫院話要整成金高恩既單眼皮添啊！
11. 金裕貞
現年只有十七歲既金裕貞四歲出道做演員，參演過好多經典劇集，例如係《懷抱太陽的月亮》，都令觀眾留下深刻印象。直到今年出演《雲畫的月亮》，正式擔正做女主角，「樂溫」一角成功令佢年尾大爆紅！
12. 朴寶劍
最後一位！係大勢中既大勢－朴寶劍！上年《請回答1988》崔澤一角令寶劍深受大眾喜愛，到今年熱播既《雲畫的月亮》，寶劍演技更加係大爆發！絕對係2016年你唔可以唔識既韓國男演員！
笑起黎超級暖又可愛既寶劍喺韓國更加有「國民老公」之稱，就連中港台都超級多粉絲，唔少廣告商都睇中寶劍既魅力搵佢代言啊！2017年度既可口可樂代言人正是寶劍啊！
小編表示柳俊烈、朴寶劍同埋宋仲基都是我的菜啊～期待各位2017繼續帶多啲好既作品比我地啦！
圖片來源：網上
撰文：Msrachel
