小編睇魔幻電影既時候，成日見到佢地攞住一本又一本既魔法書，都會好渴望自己都有一本，入面仲有無窮咒語可以用，咁就變咩都得喇。喺外國就有班經驗豐富既造書人，2012年既時候自設品牌，專造全手製魔法書，佢地既首席造書人仲被譽為世上造書技巧最高既人添，就等我地一齊睇下有咩咁厲害啦！
呢款係佢地今年既最新作品，以真皮釘裝，封面上既壓花係骷髏骨頭。
肋骨部分更加係由人手喺厚身皮革上雕出黎，書背亦有唔同既壓花，好考手工架。
呢本魔法書足足有520頁，有３吋厚，成本字典咁呀。佢既內頁係空白既，但啲紙以咖啡色染過，亦都刻意咁將內頁做成唔同層次，睇落參差不齊咁，營造出復古既感覺，好似係一本好舊既書咁。
魔法書仲有鎖鏈，咁就唔怕比人偷睇你既專屬魔法啦！
除左呢款之外，仲有好多唔同設計既款式架。
睇完之後係咪都好想擁有一本呢？不過由於係全人手製造，而且好考手工所以一啲都唔平架，單以最新款果本黎計，都要港幣６千幾蚊一本，小編我都要努力返工賺多啲錢先買得起喇。
圖片來源: alexlibris-bookart
撰文: Msrachel
