1999同2001年上映嘅《盜墓迷城》1、2由班頓費沙同麗素慧絲主演，兩集故事連貫得來又緊湊，一直以來都大受好評。2008年改由班頓費沙同李連杰做主角，故事地點由埃及金字塔搬到去中國嘅兵馬俑，評價就好壞參半，大多數人都係鐘意睇頭兩集。
不過近年荷李活經常乾塘，係咁翻拍以前嘅經典著作，而新版《盜墓迷城》改由湯告魯斯擔正做男主角。兩分幾鐘嘅Trailer已經睇到湯佬好似有不死身咁，墜完機無事翻生仲可以show下肌。
由Sofia Boutella飾演木乃伊，即古代公主Ahmanet，故事設定佢因為枉死而怨恨千年，佢個棺木有魚鰭形狀設計亦有別於過往電影中出現嘅，加上出現海底嘅畫面，而且一開眼就見到「雙瞳孔」展開，極度「吸睛」！
今次電影橫跨海陸空三地，而且由沙漠打到城市，相信木乃伊女王同「職業特工隊」嘅湯佬一定激戰連場！頭兩集大奸角炎皓鐵同奸妃段愛情已經令成個Mummy系列相當之好睇（雖然最後奸妃走路），不過小編覺得今次木乃伊設定幾有新意，希望今次充滿千年怨氣嘅古代公主可以帶俾觀眾新鮮感喇！
| {youtube}IjHgzkQM2Sg{/youtube} |
圖片來源：網上圖片/ www.themummy.com
撰文：陽光小毒毒
