雲一定係軟綿綿？大肚婆個肚一定係圓？從細到大，好多時我地因為身邊嘅事物而局限左自己嘅想像同創意。點解唔試下打破既有框框，發揮自己嘅創意去建立自己嘅世界？
超現實主義畫家Bruno Pontiroli就完全無視世界固有嘅概念，甚至顛倒世界萬事萬物。作品嘅主題可能都係人、動物或者常見事物，不過再加上荒謬同怪異嘅想像同設計，正正體現出Bruno強調創作世界入面「乜都有可能」，就誕生左呢種荒謬得黎幾得意嘅畫風。
Bruno係以另一個方式或者版本去呈現事物，重點唔在於畫作描述啲咩，而係表達緊一個充滿無限可能嘅世界。Bruno希望觀眾可以分享佢地嘅睇法同意見，而唔係睇完就算，所以無論係欣賞定係厭惡嘅反應，觀眾嘅回應正正補充左畫作嘅意義。
除左目前嘅畫作創作外，Bruno亦希望嘗試整雕塑，或者遲啲油畫上嘅創作可以立體咁展現，帶來另一種視覺衝擊，就等我地期待Bruno嘅新作喇！
圖片來源：http://brunopontiroli.com/
撰文：陽光小毒毒
