一對皮鞋值幾多罐午餐肉我就唔知，不過日本大阪一間高級朱古力專賣店「ショコラブティック レクラ」就造俾你睇，一對皮鞋有幾多朱古力！佢最近推出咗逼真到無朋友嘅『皮鞋朱古力』，名為『閃耀的紳士』。送對俾老公、男友，佢地隨時著返工，咁就真係愛的大整蠱嘞！
▲唔講真係以為係一對真皮鞋！
呢對『皮鞋朱古力』嘅鞋帶、縫線、鞋底、鞋身，全部100%由朱古力做，每個細節位都無hea你，連皮革獨特嘅光澤都充分表現埋出嚟，係一對食得嘅真皮鞋！
▲尺寸為26cm，顏色有深啡、淺啡及褐紅色。
▲買『皮鞋朱古力』，仲會送埋同樣由朱克力製成、造型可愛嘅迷你「鞋抽」同「鞋油」！
▲朱古力店位於大阪，陳設好高級，成間珠寶店咁。
呢對『皮鞋朱古力』賣29160日元（約2千港元），由2017年1月20日至2月7日期間接受預訂，可以喺2月7日至2月14日期間收到。最啱用嚟送俾男友做情人節禮物，相信男友收到呢對咁有心思嘅「皮鞋」，一定超驚喜！不過一定要提佢唔好著、唔好周圍擺。但係點解無女裝嘅呢？女人唔一定要收玻璃鞋架！
圖片來自：www.rihga.co.jp
撰文：Irene Leung
