Twins成軍十五年，由兩個唔識的陌生人變成互相的另一半生命，擁有比真正姐妹更深的姐妹情。小編由她們之間的一舉一動，發現六大閨蜜之間必有的特徵，睇完妳就知道妳和姐妹們係咪真正的閨蜜啦！
１．熟悉對方的身體特徵
最近Twins上師兄謝霆鋒的節目《十二道鋒味》，其中一個環節要阿Sa蒙眼，單憑感覺在幾個女仔之中搵返阿嬌。阿Sa極速靠摸手仔就認出阿嬌，阿Sa話因為阿嬌隻手有肉但特別細，而且手指比較短，所以好易就搵到喇。妳又知唔知道妳的姐妹們有咩特徵呢？
２．互相的家人都變成彼此的家人
Twins經歷十五年，彼此的家人都是對方的家人，就像真的姐妹一樣。阿Sa曾經在做訪問時被問到覺得對方有咩改變左時，佢咁答：「很多東西變了，但感覺是一樣的。正如家人一樣，誰不在變？但那個人依然是你的阿媽，不會不同。」今年的母親節，阿Sa、阿嬌更齊齊為雙方媽媽慶祝呢！妳認識姐妹們的家人嗎？
３．不介意親密接觸
Twins今年九月在深圳開LOL世界巡迴演唱會時，更嘴對嘴錫錫。而其實佢地錫錫係有前科架，早在之前去廣州舉行粉絲見面會既時候，都已經錫過一次架喇。真係隔住個芒都feel到果份感情呀！小編表示呢樣真係只有感情極好的閨蜜先做到架！
４．有一首屬於彼此的主題曲
Twins雖然出過N首講友情的歌，但相信佢地同大家都會覺得《相愛六年》先係佢地的主題曲，而呢首更加係佢地逢唱必喊既歌呀！當年人人彈起演唱會的時候Twins喊住唱，佢地之後話其實一上台已經想哭，總綵排時唱更加哭得比正式演唱更厲害。《相愛六年》時，阿Sa就將之改名為《相愛十年》，二人互望唱出此歌時，更邊哭邊相擁起來。呢首歌由林夕填詞，完全寫出Twins的心路歷程，小編當年喺現場都同好姐妹一齊喊到停唔到。妳們的主題曲又係邊首呢？
５．會時不時到對方家過夜孖鋪
ＬＯＬ世界巡迴演唱會香港站時，阿Sa提起當年未入行岩岩識阿嬌既時候，已經唔痴家咁成日走去阿嬌宿舍過夜傾心事，兩個仲嘈到成日被鄰居投訴添呀，不過佢地都話係好開心既回憶黎架！妳又有無同姐妹們訓埋一張床，傾下傾下就天光呢？
６．默默支持 友情更加堅固
Twins出道十五年以黎經歷過唔少風風雨雨，不論係高山低谷，總係會默默地互相支持。阿Sa曾經喺節目入面講過，「無論你開心或是發生了甚麼很大的事情，你以為整個世界的人都會討厭你，要放棄你，但是你身邊還會有她在，我覺得這樣是很感動的」。而最近阿Sa的外婆離開，阿嬌就同阿Sa講「我會陪著你」，令阿Sa好感動，正正就好似佢地首「友誼第一」入面歌詞所講，「沒有管他們是非敢與我嬉戲，叫我發現誰是我的真知己，在我給別人猜忌肯替我出氣，無論競賽怎樣殘酷友誼第一是你」。每次發生大件事，你先會望清楚邊個係你既真正朋友，你地又係唔係呢？
大家都要一直記得就算朋友仔感情再天真，亦是你永遠也會愛惜的人呀！
圖片來源：新浪娛樂、choicharlene@微博、網絡圖片
