少年，你太年輕了！如果所有女人的說話你都相信，難怪你每日都俾人西面。其實女人既語言當中，包含住好多口是心非，好多語言陷阱，Youtube曾經流傳過一段影片，有部「女人翻譯機」可以正確傳遞女人既說話，可惜科技未有咁發達，今日就等小編來為眾多苦海孤雛指點迷津！
1. 「我唔阻你喇！」
千萬唔好答「哦，咁好喇」或者「咁我做野先」，因為咁樣就代表佢真係阻住你。如果你打機打到女朋友開始俾說話你聽，解決方法只有一個：唔打（再陪女朋友）。因為打機同女朋友可以共存既機會係微乎其微，所以唔想激嬲女朋友就記住適可而止。不過如果係正經事或者其他緊要野（我明打機都好緊要），就講明俾女朋友知你既難處，咁女朋友都應該要識做喇！
2. 「今晚玩得開心啲。」
如果你答「哦，我會架喇」，除左必死無疑之外應該無其他下場。十之八九講得呢句，代表你即將要去既聚會無女朋友份。通常留係屋企既女朋友就會好得閒，之後亂諗野，之後唔開心，之後發脾氣，最終受氣既又係你。
臨出門口同女朋友講句「我今晚會早啲返來陪你架喇，記住食野唔好餓親，一陣見」，佢通常就會放你一馬，因為你個心無忘記獨留家中既女朋友。
3.「我無事啵。」
如果連呢句你都聽唔明，你好應該要反省下自己有幾唔醒目。「我無事」同「其實好大件事」係一樣意思，通常女朋友塊面係木口木面（或者黑口黑面），醒目既就快啲關心下女朋友，唔好真係相信女朋友無事。
4. 「我唔想見到你啊，你走喇！」
通常傾唔掂數，瀕臨炒大鑊既時候，女朋友就會講呢句。如果你一個轉身，頭也不回咁走左去，你就上當喇！通常女朋友已經好嬲既時候下，就會講一大堆「走喇你」、「我唔想見到你」既說話，但係呢個時刻最重要係一個（霸氣式）抱抱。無論女朋友大吵大鬧或者推開你，你都唔可以放手，因為抱抱係會令女人秒速心軟，再加一個摸摸頭，點會唔冧？
唔想每時每刻都見到女朋友既黑面，小編勸你快啲學識分清女朋友講既到底係真話定反話，如果唔係就要等到有朝一日「女人翻譯機」的誕生（應該有排）！
圖片來源：網上圖片
撰文：茶記水哥
