教育電視都有教，見到蛇個陣千其唔好掂，因為佢可能有啲不知名毒素，會危害到自己嘅生命，呢啲小學生都知嘅常識印度成人竟然唔識。印度有個叫Bhola Nath嘅男人住喺位於印度東北嘅比哈爾邦，有一日佢喺街發現一條唔郁嘅眼鏡蛇，就諗條蛇可能喺度冬眠，既然無危險性就諗住捉佢上嚟玩下。佢忽發其想，覺得如果縫埋條蛇個嘴會好有趣，於是就一手捉住條蛇，一手拎出針線，直接插落條蛇個嘴。
| {youtube}w9N-r3APwC8{/youtube} |
但點知條蛇突然驚醒，狠狠咬咗Bhola一下。正常人俾蛇咬完都一定去睇醫生，但好明顯Bhola一啲都唔正常。佢竟然覺得剩係有少少痛無咩大不了，仲帶埋條眼鏡蛇返屋企休息。返咗屋企無耐Bhola就全身發紫，呼吸困難，佢屋企人呢個時候先知道大件事，即刻送佢入醫院。可惜一切都已經太遲，Bhola已經毒發身亡，神仙都救唔返。事後Bhola屋企人為咗報仇就亂棍打死條眼鏡蛇，一場鬧劇至此終於完結。
網民都一面倒話Bhola抵死，甚至仲有唔少人同情條眼鏡蛇，話哂當初條蛇都只係自衞先會咬人，最後就慘俾亂棍打死。小編喺度温馨提示，眼鏡蛇係神經性毒蛇，毒液入面有細胞組織毒素同神經毒素，可以令細胞組織壞死，亦可以阻斷神經傳導、麻痺肌肉，所以離遠見到眼鏡蛇就記得快啲掉頭走啦！
圖片及資料來源:Bastille Post Global，Youtube
撰者:Yee
