2018開始咗幾日，身邊總有幾個人患上「新一年我會改變症」，呢種人為自己喺新一年訂好多目標，但去到年尾就發現冇一樣做到，之後就同自己講自己新一年會改變。你又係唔係呢類人﹖想2018有所改變，不如試試下列三個訂立目標方法，可能2018年你真係有所改變。
1. 除咗目標，要訂立埋實施具體方案
有目標但冇行動，目標永遠只會係目標，而唔會成真。要達到目標就要有埋PLAN。個Plan唔一定要好詳細，好似返工交proposal咁，可能只係達成目標嘅其中一個要做嘅行為就可以。
舉個例，如果你目標係減肥，咁就太籠統，唔夠具體，你仲需要立埋實施方案。而你要做嘅野可能有好多，飲食上，生活習慣上，運動上等等。但你第一步唔需要樣樣做曬，先做好一樣先，可能係每星期運動3次，每次30分鐘，再定期檢視自己做唔做到。咁比起只係希望2018減到肥實際得多。
2. 目標係"I Should" ，唔係 "Don't"
好多人訂目標都會希望自己改咗一啲陋習，例如係「食少啲零食」，「唔好夜訓」。但有研究曾經指出呢類有「Don't」含意嘅目標大多難以實現，因為好多時你都係打擊自己做一個行為，希望控制自己，但你有冇信心控制自己一年﹖反之用「I Should......」去做開頭，如「食健康啲」，再加上第一項方法加上具體方案(如日日食到5份蔬果)，就更易達到。
3. 目標可以係開心事
好多時訂目標，大家都會諗起減肥，學日文呢類，但個List不如加多一兩個目標係輕鬆做到又開心嘅。目標唔一定樣樣都係苦差，新年大計都可以有應加入少少輕鬆好玩嘅目標，好似同屋企人去旅行等等。享受追逐目標嘅過程，對實現目標都好重要。
希望大家2018真係達成目標。
選文: JJ Wong
