自從美國著名監製Harvey Weinstein被多個女明星指控性騷擾後，成個荷里活都掀起咗一股指控潮。其中男演員Anthony Rapp早幾日就喺Buzzfeed嘅訪問中指控30年前曾經被《紙牌屋》男主角Kevin Spacey性騷擾。
佢話喺1986年，當時Kevin26歲而佢只有14歲，佢哋因為一齊合作百老匯舞台劇而認識。Kevin邀請佢到屋企參加派對，等到其他人走晒就開始毛手毛腳，想引誘佢發生性行為。Harvey Weinstein話自從Harvey Weinstein事件被踢爆後，佢認為係自己一直嘅沉默先令到更多人受害，所以就決定企出嚟控訴犯上同樣罪行嘅Kevin。
自從呢個訪問出街後引起網民熱議，而Kevin亦道歉，仲公開埋自己男同志嘅身份。
簡單嚟講，佢表示自己唔記得咗30年前發生過一件咁嘅事，如果佢真係有做過，亦一定係因為飲醉酒先做出啲咁唔恰當嘅行為。佢亦同Anthony Rapp道歉，仲話決定以後都公開坦誠咁面對所有事，所以公開同志身份。
但有部份網民就唔信佢，仲話佢公開同志身份係想轉移視線。
可能驚劇集收視會收到Kevin醜聞影響，Netflix宣佈2018年中播埋已經開拍嘅《紙牌屋》新一季後，就唔會再拍落去，其他Kevin有份嘅劇集可能都會落架。而MRC同Netflix更發表聯合聲明，新一季嘅拍攝工作將會無限期暫停，直至另行通知，所以2018年係咪真係有新一季睇仲係未知之數。
網民聽到消息後都大叫可惜，仲問點解Netflix要未審先判，估唔到Kevin星途就咁畀個大話破壞。
到底Kevin有無性騷擾只有當事人知道，希望呢件事可以快啲處理好喇～
資料來源：DEADLINE，BUZZFEED NEWS，UNILAD
撰者：Kinnie
