美國第二大連鎖戲院Regal Cinemas旗下部分戲院將喺明年實施一種實驗性票價，熱門電影將會收貴啲；而比較冷門嘅戲就會收平啲。
雖然Regal Cinemas係美國第二大連鎖戲院集團，但由於Netflix同其他類似平台興起，戲院收入一直下降，所以集團就決定改變以往嘅售票模式。
集團相信呢個方法除咗可以提高熱門電影收入，仲可以推高埋冷門電影嘅票房，一舉兩得。美國大部分電影業者亦都好期待今次票價改革嘅結果，想睇下會點樣改變觀眾嘅消費模式。
但亦有電影網站認為票價改革係不思進取，反而應該諗下點改善自己嘅設備，吸引更多觀眾入場。
而家呢個改革只係好初步嘅概念，具體點定義熱門電影都仲傾緊。例如《雷神》好明顯係熱門電影，但今年大賣嘅《訪嚇》其實只係低成本製作，上畫前亦無諗過會稱霸票房，咁電影公司又會點定佢嘅價錢呢？
下年就會知道改革係成功定失敗，如果成功嘅話，相信香港都好大機會會跟埋一份～
