美國5歲男童成貓俠 拯救流浪貓

相信同貓玩過嘅你哋都知道，有啲貓好高傲點都唔理你，所以好多人都會希望自己有貓貓磁場，去到邊都吸引到啲貓同你玩。美國費城就有個5歲男童咁幸運有呢個才能，佢仲好好咁利用呢個能力去幫助流浪貓添～

呢個男仔叫Shon Griffin，佢屋企人一向都參與拯救同照顧流浪貓嘅工作，近排就被指派要照顧一班叫「Kolony Kats」嘅流浪貓。點知其中一隻貓Bug就點都唔理佢哋，咁啱Shon嚟到Bug就即刻走過去嗲，佢屋企人就驚覺原來Shon有貓貓磁石，於是就開始叫Shon參與佢哋嘅工作。

之後「貓俠」就開始佢嘅拯救工作，佢每次去照顧流浪貓嗰陣都會著上佢最鐘意嘅英雄人物衫～

無論咩品種年齡嘅貓都俾Shon呢個磁石吸引住，每次一見到佢就會衝埋去嗲。

佢嘅事跡放咗上網後得到網民一致認可，小編都想有個「貓俠」朋友啊！

其實唔洗拯救全世界先算係英雄，好似Shon咁盡自己小小綿力，都已經係一個人人稱頌嘅英雄人物喇～

圖片及資料來源：BoredPanda
撰者: Kinnie