Poly原來已經80週年，80年嚟大大話話都發生過唔少事，以下呢5樣嘢，有幾多你係聽過？
1. 理工大學校歌
學校有校歌就好正常，但Poly首校歌就出名易唱又洗腦，擔保你聽一次就朗朗上口。睇到歌詞嘅時候真係差小小以為係幼稚園校歌～不過有時啲嘢簡單就係好。
歌詞：
我們一起來到理工大學 理工大學 理工大學
我們一起來到理工大學 理工大學是我家 家 家 家
We are going to the Polytechnic Polytechnic Polytechnic
We are going to the Polytechnic Polytechnic is my home home home
2. 白色奇異建築
去過Poly嘅一定見過呢座白色大樓，大家覺唔覺得佢嘅形狀好奇怪呢？其實佢係出自著名建築師 Zaha Hadid 女爵士之手。呢位建築師生於伊拉克巴格達，佢嘅設計經常都突破傳統形態，作品每次都天馬行空到嚇親人。喺男性主導嘅建築界入面，佢係第一位獲得英國皇家建築師學會金獎章嘅女性，更係全球第一位榮獲普立茲克建築獎 (Pritzker Architecture Prize) 嘅女建築師。除咗Poly呢座建築外，廣州大劇院、首爾東大門設計廣場都係出自佢之手架～
3. Poly掌上壓
四個人進行掌上壓嘅時候，將腳放上其他人嘅腰上。因為完成後貌似理工大學嘅標誌而得名。通常「POLY掌上壓」都會喺ocamp等嘅團體活動中作為輸家嘅懲罰。
4. 餐廳
Poly入面有好多餐廳，但有一間係Poly人定街外人都極力推祟嘅，佢就係俗稱「靚can」嘅劇院茶座喇～「靚can」性價比極高！就算set dinner都只係50零蚊，已經有餐湯主菜餐飲，簡直係平絕紅磡啊！佢嘅味道仲要唔差，難怪被封為學生最愛喇～
5. 鬼故
所有學校都一定會有鬼故，Poly都唔例外，以下就同大家講3個比較多人知嘅都市傳說。
a. 永遠「紅不了」的BLOCK X
以紅磚出名嘅POLY，明明由BLOCK A至Y都清一色紅磚設計，但係一眾建築中，偏偏得BLOCK X係綠白色。傳聞就係話當初興建果陣有位工人意外身亡，自此之後無論查幾多次紅油都會甩，牆身都查唔到紅色，所以校方就唯有上綠白色。依個傳聞係每年迎新都一定會講嘅重點傳說！
b. BLOCK Y係一個隱藏停屍間？
「Block X 傳聞」應該有好多人都聽過，但其實BLOCK Y都有一個傳聞。據講X以前係會用嚟存放屍體，但係而家已經轉咗去Y Core 14/F，好似係比讀護理系嘅學生做解剖。有POLY嘅學生表示，明明Y CORE係一棟新building，但唔知點解每次行入去都會覺得有啲奇怪嘅感覺。
c. 舊can窗口膠紙之謎
Poly人都叫位於VA嘅Canteen做「舊can」，大家去食飯嗰陣有無發現窗口貼晒膠紙呢？舊can出面就係游泳池，相傳以前有個外國教授帶個仔去游水，點知就不幸浸死咗。自此好多人喺個度食飯都見到一個面色蒼白嘅外國男仔喺窗外童望住佢哋，之後仲會由腳開始慢慢消失。為咗唔好再嚇走客人，舊can老闆就決定用膠紙遮住半邊窗，令大家都可以食得安心啲。
圖片來源: 網上
撰者：Kinnie，Yanica
