李浩翔，曾玩劍球玩到登上劍球世界排名14，劍球界裏講起劍球實提起佢。明明可以繼續無憂無慮做個選手，突破自己，但佢卻唔甘於只做一個劍球好手，因心底有個更宏大嘅劍球夢：要令香港較冷門嘅劍球得到更多人認識。佢愛劍球愛到辭去全職，成立香港劍球花式協會，慢慢由選手轉為全職推廣劍球。但，偏偏喺香港玩劍球尤如「闖關」，試過喺濕地公園草地玩，卻被保安以奇怪好笑理由－－「會嚇親啲雀」為由被驅趕。
{youtube}PC0-VcGbOq4{/youtube}
|
從10蚊店劍球到劍球好手
李浩翔，26歲，玩咗劍球約十年，最初接觸劍球係從10蚊店果個唔標準、縮小迷你版嘅劍球開始。「我玩咗兩個星期都未成功過（將個波拋到皿上）」後來佢透過玩滑板嘅朋友接觸標準劍球，從此迷上咗劍球，由玩滑板轉至專注喺劍球上。「劍球招式比滑板變化更多，可以自創招式，比滑板更吸引我。」 佢回想返十年前第一次接觸劍時，劍球喺香港係相當冷門運動，當時Youtube幾乎無劍球教學，佢只能憑著一張日語劍球說明書同朋友嘅教導，學習劍球。日子有功，全職工作嘅佢利用餘暇時間不斷練習，玩到可以參加日本劍球世界盃大賽，最高排名更達到14，自創難度系數11招式，更被列入大會指定難度招式。並且得到台灣劍球商贊助，亦曾到台灣集訓。
▼李正在用台灣贊助商為他設計嘅劍球練習
當然，作為運動員不免遇到挫折，佢嘅劍球路亦非一帆風順。佢曾試過收到入圍世界級比賽嘅Offer，立即辭去全職，全心全意練習劍球。點知比賽當日因太過緊張而失手。台下贊助商老闆見到佢失手，立即衝上前擁抱佢，安慰佢話：「我知道你盡咗力。」
「我果刻其實係反應唔嚟，兩個麻甩佬係台下中央攬住，成何體統呢，人地唔知仲以為你嬴咗」當然，佢心裏其實十分感激呢位老闆。而他立志喺香港推廣劍球，箇中原因不免源自老闆一句「警世之言」，提醒咗佢就算佢玩劍球好叻，好多人識，但個人知名度卻對劍球運動發展無太大幫助。經過約一年籌備，最終係一年半前成立「
香港花式劍球協會」。幾個月前佢辭去全職，全職推廣劍球，會務幾乎「一腳踼」，漸漸將專注力由參賽轉至推廣劍球，成為提攜新人嘅教練、前輩。
玩劍球如「闖關」 被保安驅趕：「會嚇親啲雀」
如今佢每逢星期六日就會到市集擺檔，表演劍球，訪問當天有兩位成員係市集遇上他，從而加入練習團隊。但要喺香港呢個重重障礙嘅城市裏團練，卻要搞到好似「闖關」咁－－佢地約五至六人喺公園／空地練習，經常被保安驅趕，聽過最奇怪又好笑嘅驅趕理由竟係「唔好係呢到（濕地公園前草地）玩，因為太靜會嚇親啲雀」。因經常被驅趕，他們經常留意邊到有公共空間落成，每逢有新嘅公共空間，團員之間都會開玩笑地話又去「闖關」，試探一班人玩劍球會否被驅趕。訪問當天，記者們約佢地到平時練習嘅荃灣大會堂對出嘅小公園拍攝。被保安驅趕慣嘅佢就話，試過四五個人喺呢到玩劍球，保安走來同他們講呢到唔畀玩球類活動趕佢地走。佢又話被驅趕到一個程度，連保安都認得佢。而晚上他跟團友六人喺波鞋街新落成商場地下空地練習，亦惹來黑衣黑褲保安勸喻驅趕。
▼李平時練習嘅荃灣大會堂對出嘅小公園。環視四周不見有任何標語禁止球類活動
他不諱言「喺香港好多嘢都要偷偷地做，有咩唔係偷偷地做」。此言非虛，對於活喺重重障礙裏尤如「圍城」嘅一眾蟻民，或者只能係夾縫中遊走，同呢個制度周旋到底。勸喻年輕人追夢要有準備對劍球痴心一片嘅佢，夢想當然係希望劍球喺香港發展蓬勃。即使佢幾享受做選手無憂無慮嘅時刻，但無奈地香港劍球發展情況尚在起步階段，逼於環境因素，佢亦由選手漸漸轉至全心推廣。家人、朋友知道佢全職做劍球推廣，亦十分支持。
▼佢愛劍球愛到連身上嘅項鏈都係劍球，連tee都係劍球圖案
面對愈嚟愈多年輕人「追夢」，佢則勸喻各位年輕人要深思熟慮先行動，亦要顧及到身邊嘅人，包括家人。「可能自己年紀大咗，考慮嘅嘢多咗。好似我成立協會前後都花咗一年時間籌備。」講到底，「追夢」除了要有決心、意志、毅力，亦必須要深思熟慮，不論結果如向，人生是自己嘅，「條路自己揀，_ _唔好喊」，到底要向自己人生負責。
採訪：Vivian 、 JJ Wong 文：Vivian 拍攝：JJ Wong、林駿康
