創意料理食府Le Rêve喺10月10號正式進駐銅鑼灣，巴西籍主廚Isy自幼喺南美洲生活，之後重喺世界各地旅居經歷中汲取靈感。佢地將會喺今個秋天推出全新嘅秋季饗宴，精心設計出六道菜同八道菜嘅晚餐，以及四道菜嘅周末早午餐。餐廳嚴選上乘海鮮同時令農產，炮製出最美味、賣相最精致嘅佳餚，務求令客人可以品嚐到環球美食。
主打嘅八道菜晚宴以「布拉塔芝士配覆盆子冷湯」（Stracciatella di Burrata）掀開序幕。香濃幼滑嘅布拉塔芝士巧妙配搭清新酸爽的覆盆子冷湯，面層灑咗開心果同金箔羅勒脆片，增添新鮮爽脆嘅口感。
隨後奉上嘅「墨汁蛋黃醬八爪魚」（Octopus and Black Mayo），將蛋黃醬用魷魚嘅墨汁染成黑色，為爽口彈牙、光澤飽滿嘅日本八爪魚增加濃郁鮮味，配以鮑魚汁同醃石榴啫喱，塑造意想不到嘅甜酸滋味。
另一道海鮮佳餚「惹味原隻飛魷魚」（Flying Squid）用意大利西西里海域新鮮飛魷魚，配搭口感鬆化嘅芫荽脆片同鮮美甘甜嘅法國銀魚泡沫，令人流哂口水。以綠番茄製成嘅醬汁喺一旁點綴，令人聯想起綠意盎然嘅池塘。
為延續海鮮主題，另一道菜「雪場蟹濃湯」（Snow Crab）嚴選日本雪場蟹同秋季時令蒜蓉菌，炮製成暖意窩心嘅滋味湯品。色澤清澈透亮嘅蟹肉高湯將各種食材嘅味道完美融合，散發誘人香氣。
最後一道海鮮料理「香煎黑鱈魚」（Simply Cod）選用秋冬時令嘅黑鱈魚，烹調得啱啱好。底部鋪滿口感鬆化嘅啤酒蛋白糖霜脆片，淡淡嘅啤酒苦味同甜美多汁嘅魚柳可以話係天作之合。
至於肉類方面，食客可以揀「經典燒鹿肉」（Venison）或「風乾熟成牛肉」（Master Beef）。前者以傳統手法煮，搭配蘇格蘭斯托諾韋血腸醬同黑朱古力岩石，非常濃郁可口；後者採用30日風乾嘅熟成牛肉，配搭紅莓芥末醬同黑杏鮑菇，風味絕佳。
第一味甜品「熱朱古力蛋糕」（Hot Chocolate Cake）不含麵粉，用焗爐加熱後放上百里香雪糕同開心果脆粒，然後淋上色澤金黃的黃薑忌廉醬汁。新穎獨特嘅配搭令人眼前一亮。
由大廚Isy悉心設計嘅創意甜品「Ride On…!」則充滿玩味，為一餐畫上圓滿嘅句號。依道甜品有多種創新料理元素，並將各種口味共冶一爐，當中包括紅桑子醬、白朱古力，以及別具風味嘅日式芥末黑芝麻同香草黑朱古力。
各款新菜單由10月2日（星期一）起正式供應，包括六道菜晚餐（港幣850元起）、八道菜晚餐（港幣1,150元起）同四道菜周末早午餐（港幣490元起），全部另設加一服務費。
顧客仲可以喺優雅私密嘅用餐區一邊享用精心設計嘅美食，一邊欣賞室內嘅藝術作品！
資料及圖片來源：Le Rêve
撰文：Yanica
