韓國最近有一對兄妹喺失散52年後重逢，哥哥忍唔住抱著阿妹痛哭～令佢地重逢嘅就係靠韓國零食爆米香包裝背後細細嗰一張相～！
當時韓國10歲男孩李智希同8歲嘅妹妹李永珍，兩人經常陪阿媽到南大門市場擺攤做生意。阿妹失蹤當日，擺完攤後兩人喺回程路上，哥哥李智希發現跌咗銀包，想折返原路搵銀包，於是佢叫阿妹喺巴士站等佢返嚟。當哥哥搵到銀包返去巴士站時，已經唔見阿妹蹤影。佢同阿媽四處搵阿妹，但都搵唔返阿妹...
即使哥哥李智希長大成人後，佢地依然都無阿妹嘅消息。2016年，兩人嘅媽媽帶住仍未能尋回阿妹嘅遺憾離世，於是哥哥更加下定決心要搵出妹妹。
喺呢個時候，長期協助李智希嘅失蹤兒童機構「綠傘」有個諗法，佢地同韓國零食爆米香合作，係零食包裝背後印上失蹤兒童嘅相，增加失蹤兒童曝光率。
▲組織「綠傘」與韓國公司合作，將6個長期失蹤兒童嘅相印係包裝上
長期失蹤嘅兒童包括李永珍等6人嘅相，就印喺包裝上。而今年5月，有一位韓國婦人突然打電話話喺餅乾包裝上見到自己張相...
阿哥當初接到呢個消息係半信半疑，但經DNA鑑定後,証實佢就係失蹤多年嘅妹妹！
▲失散52年後重逢，李智希擁抱阿妹激動流淚:「媽媽，我搵到阿妹!」
而李永珍事後回憶話，因當時年紀太細,佢都唔記得自己點解會失蹤。宜家佢住喺離原生家庭唔遠嘅忠州，某日佢見到零食包裝背面有自己張相，先發現自己一路係失踨兒童～
除咗社交媒體廣發尋找，零食包裝都可以架，畢竟好多人都鐘意食零食～
資料及圖片來源：http://heraldk.com/2017/09/01/죠리퐁-덕분에-52년만에-남매-상봉/、綠傘
文：維
