整套戲唔係以傳統故事「起承轉合」講故事，導演譚家明直言用片段式寫一班好自由年青人，以即興方式做任何嘢，等待生命力爆發。
即興，係年輕人獨有嘅意志與生命力。做事無太多顧慮，想做就做，唔會好似成年人咁多顧慮，做任何事前都先要計過度過。
戲內張國榮同葉童認識第一日就發生關係，就咁開始成為戀人；而湯鎮業同夏文汐先成為冤家，之後喺胡鬧、互相挑逗嘅過程裏成為戀人。後來，湯原本約定夏喺佢人多擠逼嘅屋企做愛，湯盡力使走家人，但中途兩度被鄰居打擾，最後仲要被唔知情嘅阿爸以鎖匙開門入屋，跟住阿爸嗰班麻雀好友仲要入屋開枱，搞到慾火焚身嘅佢地只好掃興走人。兩人當然意猶未盡，搭電車打算到夏嘅屋企再續前事，但慾火難耐，兩人喺上層電車，不顧中年男乘客鄙視，肆意挑逗，逼走男乘客，當場發生關係。
▲當年電車性愛場面惹來極多批判，要刪剪鏡頭先可以通過電檢處。
▲哥哥（戲內飾Louis）與葉童(戲內飾Tomato)在餐廳偶遇，認識第一天便發生關係。
原來，最初劇本構思係到夏嘅屋企翻雲覆雨，但拍戲時出現阻礙，導演譚家明一轉念，就諗到喺電車上拍。電車有固定軌道行走，偏偏湯同夏就要喺好有規範嘅公眾空間做愛，越出社會所制定嘅軌道。
其實所謂「社會」，講穿咗就係由一班有權力嘅成年人所「操控」。規範就係由果班有權有勢嘅成年人制定。而規範、制度好多時其實都係由呢班「成年人」講左就係。簡言之，呢班「成年人」即係「老屎忽」。佢哋睇到性玩具店播性玩具宣傳廣告、睇到女學生被男老師引誘嘅新聞、睇到好多學生承受唔到壓力就會「聖人mode」、「父母心」上身，指罵年輕人「不懂事」，「唔識諗」，「唔識保護自己」芸芸。
其實班「成年人」何嘗又懂得年輕人嘅心事？
但年輕人其實已經失望到「唔在意」呢個令人失望、由成年人所操控嘅「社會」－反正年輕人做咩都好，都會被「成年人」指著鼻頭罵，例如「宜家啲90後少少嘢都唔捱得」，擺出一副「我老子後生時都係捱返嚟，香港呢個地方遍地機會肯捱就有」、「少少嘢就喺到嘈天巴閉」、「老子食鹽多過你食米」嘅噁心嘴臉。戲裏兩對情侶到大嶼山過田園生活，好似遊牧民族一樣，鍾意做咩就做咩，無所事事。對於佢地嚟講，意義唔重要，反正無無聊聊又一日，其實都係日常生活一部份。更何況，呢個由成年人操控嘅社會根本唔到佢地話事。
戲裏當葉童講：「嗯！我地對社會好似無咩貢獻咁」張國榮即刻大聲反駁：「咩社會，我地就係社會！」其實隱約反映咗嗰一代年輕人嘅失落。
兩對情侶過遊牧式生活，夢想坐張國榮嘅船「Nomad」橫過阿拉拍，對生命充滿熱情，但就被戲內嘅「成年人」當頭潑冷水，以日文嘲笑佢地「竟夢想穿過阿拉拍，真係傻仔」。
年輕人在意嘅嘢事，原來呢個社會裏嘅成年人根本就唔在意。既然年輕人在意或唔在意，嗰班成年人都唔會變，社會依然跟舊規則行，唔會聆聽年輕人嘅心底話，咁倒不如「唔在意」呢個社會點諗佢地，胡混過日子。反正「唔在意」呢個成年人嘅社會，仲會活得比在意嘅人更快活。
佢哋過住「遊牧」生活，放浪形骸，又何嘗唔係對嗰個由「成年人」講咗就係嘅社會，一種消極嘅抵抗？
反正「我哋（年輕人）就係社會」，唔需要理會成年人嘲笑、冷眼嘅目光，因為將來嘅社會係我哋，我哋就係社會。
圖片及資料來源：互聯網
文：我左眼眉跳
