以前嘅台劇真係套套都好好睇，有劇情又有型男美女，好多套而家小編仲會不時煲返架～大家心目中嘅最有回憶台劇有無以下呢7套？
1. 惡作劇之吻
呢套真係小編最愛！！雖然之後泰國、韓國甚至台灣自己都翻拍過，但小編最愛嘅始終係林依晨同鄭元暢嘅版本～湘琴同直樹嘅故事有笑有淚，仲記得直樹喺醫院偷吻湘琴個幕，小編真係叫咗出嚟啊！之後直樹喺雨中表白一幕小編已經翻睇到識背～
相信每個女仔睇嗰陣，都會幻想自己就係湘琴，直樹實在太靚仔喇！！！
2. 我可能不會愛你
又係林依晨嘅作品，但今次男主角就變咗陳柏霖～雖然佢哋都有另一半，但就依然好關心對方，最後終於發現最愛嘅一早已經喺身邊～
嗰段時間好多人都話想搵到自己嘅李大仁，你哋而家搵到未？
3. 下一站，幸福
悽美嘅愛情故事，其實故事內容有啲老土，但劇本張力總係會令觀眾愈睇愈投入，每次見到光晞同慕橙又誤會對方時，都會好肉緊好想佢地可以幸福落去。
4. 命中注定我愛你
「九十九次我愛他，少了眼皮會亂眨～」佢嘅歌小編到而家仲識唱架～因為入錯房而搞到奉子成婚，唔係命中注定又邊有可能啊～
當年睇住陳欣怡流產，小編真係心都痛埋啊！好彩佢哋最後都和好如初，開心幸福咁生活落去。
5. 海派甜心
達浪嘅冬菇頭同達浪舞成為當時一時熱話，大家仲一齊學跳達浪舞添～
小編都係比較鐘意小豬仲係達浪嗰陣，佢做返薛海之後就同普通偶像劇無分別～
6. 惡魔在身邊
呢套可能唔係最好睇嘅台劇，但一定係最有回憶嘅台劇！齊悅同江猛呢對由主人奴隸，到兩姊弟，最後再到情侶嘅關係令觀眾睇到津津有味。再加上有型男賀軍翔同好多好歌，呢套又點會無回憶啊～
齊悅江猛大戰後阿猛嘅笑容真係俘虜咗萬千少女心啊！
7. 愛情魔髮師
最後又點少得183club嘅《愛情魔髮師》呢～雖然佢哋另一套《王子變青蛙》出名啲，但小編覺得亞斯同小貝嘅愛情比較深刻，連歌都好聽啲～
有回憶嘅台劇又點只咁少，小編成個初中都俾台劇包圍住，大家又有無其他與別不同嘅台劇同小編開心share吓～
