好多人減肥時都會選擇用水果代替主食，勝在健康又好食，不過部份糖分及卡路里太高嘅水果應該避免過量進食。而以下呢五款水果大家就要注意唔好食咁多喇！
1. 西瓜
夏天食凍冰冰嘅西瓜解暑真係好舒服架，有時不知知覺間真係食咗半個都唔知。雖然西瓜熱量低，但卻含有大量果糖！果糖同葡萄糖唔同，葡萄糖會令人有飽肚感，不過果糖就唔會，令人不自覺一啖一啖愈食愈多，愈食愈肥。
2. 榴槤
被稱為「水果之王」嘅榴槤強烈且獨特嘅味道真係「愛者極愛，惡者極惡」。不過鍾意食榴槤嘅朋友真係要小心控制食量，因為榴槤中嘅熱量真係超級高，平均每100克有150卡，如果成個榴槤食晒更會吸收成3000卡路里，好肥啊！
3. 荔枝
人人都話「一粒荔枝三把火」，食得多荔枝除咗會熱氣，更加會致肥！荔枝嘅糖分同熱量都相當高，每100克中就有15克糖分、60卡路里，相當於四分一碗飯，所以建議大家每日最多食10粒，已經等於兩份水果，啱啱好係健康份量。
4. 芒果
好多香港人都鍾意食芒果，除咗成日飲許X山嘅芒果凍飲外，好多糖水甜品都有芒果份。雖然芒果豐富維他命C、纖維及黃體素，不過當中嘅糖分亦都相當之高架，每100克有成50卡路里！
5. 牛油果
近年大熱嘅牛油果健康形象突出，具抗氧化功效，又可以延緩衰老，而且牛油果當中嘅鉀質可以幫助去水腫。含豐富嘅維他命A、C、E嘅牛油果，同時間植物脂肪含量相當豐富，一個正常大細嘅牛油果有成322卡路里，果肉除咗少量糖分及澱粉質外，其餘都係 脂 肪 ！幸好當中嘅脂肪當中大部分都係好脂肪，係牛油果獨有嘅不包和脂肪酸。不過脂肪都係脂肪，建議大家每日食半個好喇！
圖片來源：Internet
撰文：Amber
