話咁快畢業嘅季節又嚟到，意味著各位同學都將步人生另一個階段。中學生們考到入大學故之然好啦！考唔到嘅就直接入「社會大學」架啦！而大學生們除非繼續進修啦，但十之八九都係出嚟社會做嘢，成為社會新鮮人！
對好多人嚟講學生時代就係成個人生最開心、無憂無慮嘅時光，根本唔需要為生活而煩惱。可能好多中學生會諗：「點會呀？日日溫書做Pass paper做到死就係為咗考個DSE，真係好想快啲畢業唔洗讀書呀！」當你出到嚟做嘢，「唉，好掛住讀書嘅日子呀！」就會成為你心入面最掛念嘅時光。
籍住畢業季嘅來到，小編係到推介幾套校園青春電影！等畢咗業嘅人可以借此懷緬一下開心嘅校園時光；即將畢業嘅同學希望可以從中感受到讀書年代既快樂，好好珍惜剩低落嚟嘅日子！
1.《匆匆那年》
由作者九夜茴同名小說《匆匆那年》改篇，敘事方式特別，同一般熱血、快樂嘅校園故事唔同，反而記載咗一段悲傷嘅青春記憶，同現實比較接近，有一種憂傷嘅感覺。
2.《那些年，我們一起追的女孩》
嚟一套相信大家都唔陌生，開頭到中段都笑爆肚，到最後雖然唔係完全HAPPY ENDING，但又唔SAD得哂嘅，所以可算係笑中有淚！
3.《不能說的‧秘密》
周董執導嘅第一套電影，加入唔少魔幻色彩，情節浪漫得嚟又帶出到初戀嘅嗰種含羞答答嘅感覺，電影配樂仲好出色！
4.《女朋友‧男朋友》
用咗好多台灣嘅歷史做背景，香港人睇未必好有共鳴，但係故事都係橫跨咗整個學生時代，叛逆、激情、無奈等等所有成長當中會經歷既嘢都可以一次過睇到。
5.《我的少女時代》
嚟套又係大家耳熟能詳，連帶佢首主題曲都紅埋！比較典型嘅青春愛情戲，最後HAPPY ENDING皆大歡喜！
6.《致青春‧原來你還在這裏》
卡士好強大，請嚟劉亦菲同吳亦凡玩姐弟戀，開放式結局觀眾自行想像。
7.《橘子花開》
一套講夢想嘅電影：一個背負住一班朋友嘅夢想去努力嘅故事。同樣笑中有淚。
8.《微微一笑很傾城》
一個由網絡世界發展出嚟嘅青春校園愛情故事，加入打ONLINE GAME元素十分之有趣之餘又好接近年輕人嘅生活模式。
9.《閨蜜》
好適合一班姊妹睇，講三個好好感情嘅女仔佢哋係由細一齊讀書，出嚟社會之後嘅種種經歷。當中女仔嗰種細膩嘅心思、敏感嘅情懷，點樣互相哎交又好返等等嚟啲嘢，比較適合畢咗業嘅朋友仔睇！
10.《致我們終將逝去的青春》
趙微處女作品，講述一班年輕人成長嘅心路歷程，面對人生嘅決擇每個人都有佢哋嘅選擇，想要得到一啲嘢就注定要捨棄某啲嘢。
每個人都有屬於自己獨一無二嘅嘅青春回憶，你又有冇喺電影入面搵到自己嘅影子？
圗片來源：網上
撰者：Wendy
