DC 超級英雄片《神奇女俠》（Wonder Woman）早於5月30號於香港上映，口碑相當不錯。電影喺全球各地都有不同嘅宣傳活動，而日本方面，電影公司就搵嚟Hello Kitty crossover，Kitty 迷千奇唔好錯過啊！
《神奇女俠》叫好又叫座，截至星期五全球票房已達至5億美元（約39億港元），女主角Gal Gadot 更憑電影成為唔少人嘅女神！
最近日本官方公開咗神奇女俠 crossover Hello Kitty 嘅海報，超可愛啊！雖然Hello Kitty 成日同不同嘅品牌及角色合作，不過根據Sanrio所講，今次係Hello Kitty首次同非日本電影角色合作！相當可愛嘅Hello Kitty 化身性感又霸氣嘅神奇女俠。Hello Kitty 頭上嘅紅色蝴蝶結配上神奇女俠嘅濃黑長髮形成鮮明對比，又型又得意啊！
電影日本要到8月25號先上映，不過門票早於6月17號已經開始預售，提前買飛嘅觀眾更加可以獲贈神奇女俠 x Hello Kitty 鎖匙扣或1941 年神奇女俠首次喺DC Comics登場嘅重印版漫畫。
雖然暫時只有呢張海報同個鎖匙扣曝光，不過有指呢個系列仲會推出不同嘅產品，大家要密切留意喇！
圖片來源：Twitter @wwmoviejp、comicbook.com
撰文：Amber
