2017年最受歡迎嘅迪士尼卡通一定係貝兒啦，雖然電影《美女與野獸》（Beauty and the Beast ) 已經落咗畫，但好多品牌依然以《美女與野獸》作主題推出不同產品。
而最近美國化妝品品牌LORAC 以《美女與野獸》推出一系列嘅限量發售嘅化妝品，包括眼影盤、胭脂盤、唇膏及唇彩。整個系列包裝以金色作主調配搭玫瑰花紋，夢幻又高貴，單係包裝就已經讓人超心動！
以貝兒作靈感嘅眼影盤一共有16隻色，包裝就好似一本故事書咁。眼影顏色由淺到深都相當百搭，日常返工至約會晚裝一盒搞掂晒，輕易呈現多面妝容！而且眼影盤左邊塊鏡超夢幻，讓人瞬間置身於童話故事當中！（售價 $48美元/ 港幣約$375 )
4色胭脂盤以紅玫瑰及貝兒身穿嘅黃色裙作調色設計，集修容，突顯輪廓於一身。冷暖色都有，就算不同膚色都適合！大家仲可以因應每日心情去選擇色盤調色。（售價$28美元/ 港幣約$218 )
唇膏套裝一共有5枝，透明外殼上印滿玫瑰花紋，單係包裝就已綞經冇得輸！5枝由熱情嘅玫瑰紅色至充滿生氣嘅裸色都有。不過壞消息係暫時已經賣晒，唔知仲會唔會返貨呢 :( （售價$36美元/ 港幣約$281 )
唇彩套裝同唇膏一樣色，一套就可以為妳打造透亮至鮮明顯色嘅唇妝。（售價$34美元/ 港幣約$265 )
整個系列香港暫時未有發售，有興趣嘅朋友快啲叫朋友幫手買或者搵代購買啦！賣晒就冇架啦！
註：所有價錢未包括美國銷售稅。
更多詳情：http://www.loraccosmetics.com/collections/beauty-and-the-beast
圖片來源：LORAC 官網、Popsugar
撰文：Amber
