人愈大就愈覺得有兄弟姊妹係一件好幸福嘅事，大家可以一齊成長、分享喜與悲，就算罵交都係大家嘅共同回憶。巴西有一對100歲嘅雙胞胎姐妹Maria同Paulina，佢哋就算去到100歲都創造只屬於兩姊妹間嘅共同回憶！
相當擅長替老人家拍攝嘅攝影師Camila Lima，經常從長者照片中得到啟發。早Camila 得知呢對雙胞胎姐妹即將於5月24日要度過一百歲生日，就主動詢問兩位老人家可唔可以幫佢哋影一輯相，好好紀念一下呢個咁珍貴嘅日子，估唔到佢哋二話不說，欣然同意。
生活充實又兒孫滿堂嘅Maria同Paulina並不懼怕接觸新事物，當攝影師提出話想以少女甜美風做拍攝主題，兩位老人家都冇反對，而且拍攝期間兩人都冇叫攰，更好努力咁配合攝影師。
兩位老人家笑得好燦爛，真係好可愛啊！有一個姊妹陪你一齊度過99年生活真係一件好難得嘅事。
連攝影師見到成品都話感動到想喊！
拍攝期間，兩位老人家大方地同攝影師分享自己嘅人生智慧，「人生不是關於爬上世界之巔然後知道自己贏了，而是從攀爬的過程獲得力量。」
當談及佢哋最想要的嘅生日時，Maria回答：「兩三年後吧。」雖然唔知生命嘅長短，但有好姊妹喺身旁就已經足夠。
呢輯咁靚又咁珍貴嘅相，相信對兩位老人家而言會係最好嘅生日禮物！
圖片來源：Camila Lima
撰文：Amber
