自從修圖APP嘅出現，只要影完相後禁幾個制，人人都係靚仔靚女，呃Like話咁易。而一眾明星們當然都會執一執個樣先po相。有時啲明星太貪靚或者唔小心執得太過份會畀網民笑，出事架嘛！
區文詩 (Angela)
Angela 日前喺微博貼咗佢同鄧麗欣去探啱啱做媽媽嘅好姊妹楊愛瑾（Miki）嘅相。點知P圖P過龍，出事架嘛！今次出事嘅係Miki個仔Luken。Angela P到Luken 個頭「令立立」，成個玩具公仔咁！
宮雪花
想返老回春唔係冇辦法嘅，用美圖修修咪得囉！身為專家嘅宮雪花極度迷戀美圖修修，經常花時間執到自己極大眼超V面，有時欄杆都變埋形，真係辛苦晒！
李彩樺
留意番！呢個係李彩樺，唔係宮雪花！
鄭裕玲（Do姐）
今年年頭Do姐就喺 Instagram post咗張同宣傳緊電影《小男人週記3之吾家有喜》嘅阿旦鄭丹瑞同鄧月平（Larine）嘅合照。相中Do姐皮光肉滑，正正常常，邊度有出事啊？原來出事嘅係Do姐身旁嘅Larine，Larine畀Do姐P到個頭都凹埋，陰公豬！好彩，Do姐好快就知出事，刪咗出事嗰張相，貼返張正常嘅出嚟！
范冰冰
2016年中國藝人收入最高嘅范冰冰曾大方透露自己每張上傳照幾乎都會修圖。不過今次就畀後面塊鋼出賣咗喇！明明正面嘅冰冰身形超好又有曲線，但可惜P漏咗塊鏡，鏡中嘅冰冰大咗成個碼，唔講以為係兩個人！
鍾欣潼（阿嬌）
其實張相係陳喬恩po嘅。話說上年陳妍希同陳曉結婚時搵咗阿嬌同陳喬恩做姊妹，陳喬恩之後就po番相同網友分享喜悅！點知有網友發現，陳喬恩好心幫阿嬌P瘦對腳時P到地板都變埋形。
Cammi
同陳冠希一啜成名嘅Cammi 自2013年搵到個有錢男友後，經常喺IG 貼相晒命。不過好多網友都留意到Cammi 啲相係唔合符人類正常比例。Cammi 自稱自己冇P圖，通常執相都係tune下啲色。真係？咁Cammi 可唔可以教下小編點樣可以影出長到不合常理嘅腳......？
點解腳板大個頭咁多嘅，發生咩事.....
李偲嫣
身為非明星界P圖代表嘅偲嫣BB，經常向大家完美展現出「真人同相係兩個樣」嘅絕技。睇facebook嘅相同平時喺新聞電視見到嘅偲嫣BB完全係兩個人嚟架，P圖技巧相當出眾！
喂！你唔好咁過份好喎！
圖片來源：微博、facebook
撰文：Amber
