無綫新劇《不懂撒嬌的女人》噚日開播，由一向有收視保證嘅林文龍及宣萱擔正，一眾網民相當期待。獨立強勢嘅香港女性喺職場上獨當一面、靠實力上位，喺愛情路上卻因為唔識撒嬌而輸畀一眾內地及台灣女性，而呢套都市愛情喜劇就係講述呢班獨立嘅「港女」扭轉單身終老命運嘅愛情故事。
劇集播出後網民有讚有彈。好多網民都話今次無綫以4K及全實景拍攝，畫面靚過無綫以前嘅劇集好多，拍攝上似HKTV過往嘅作品。而且今次有返啲大星撐場，網民大讚演員配搭夠晒新鮮。對白方面相比以前大膽又夠精景，好多網友都瘋狂cap圖。
不過同時間都有網民表示劇集普通話同簡體字太多，唔講以為自己睇緊大陸劇。而且一眾香港演員嘅普通話聽到唔少觀眾都有啲尷尬。雖然有雖然有林文龍同宣萱助陣，不過唔少網民覺得暫時睇落有啲悶、劇情又離地，又係成班女/仔圍埋講經，好似葉念琛啲戲咁，完全係套「港女」劇。而套劇又踩到港女一文不值，講到港女就做咩差都錯咁，有網民笑言編劇一定係畀港女hurt過！
其實只係播咗一集，好唔好睇暫時仲未可以下結論住。不過劇集談論大家最愛嘅兩性話題，角色班底好戲又多靚女，相信劇集可以繼續引起大家熱論！
圖片來源 : TVB
撰文：Amber
