香港嘅傳統習俗都無傷大雅，唔會傷害到其他人同自己，但原來而家仲有啲偏遠地區奉行緊啲恐怖傳統習俗，身處香港嘅大家係咪好難想像呢？以下圖片包含大量死人、血腥畫面，慎看！
1. 「馬聶聶」（印尼）
喺香港，如果遺體被騷擾，我地會視為大不敬，但喺印尼南蘇拉威西省山區嘅少數民族托拉查人就唔同，佢地每隔3年，就會將死者由墳墓中挖出嚟，仔細幫佢地打扮，帶住屍體喺村莊行直線，將棺材換新或整修再下葬。佢地叫呢個行為做「馬聶聶」，認為係一個紀念生命嘅祭典。
呢項傳統已經有幾百年歷史，當初係一個叫Pong Rumasek嘅獵人喺山區打獵時發現一具無名屍，Rumasek幫屍體著衫，並幫佢下葬。Rumasek相信呢個舉動會為佢帶嚟好運。之後托拉查人就繼承咗呢項儀式，佢地相信照顧完屍體，祖先就會帶好運俾佢地。
2. 手指截肢（印尼）
由細到大，我地都知道唔應該自殘，但喺印尼巴布亞嘅丹尼部落，當女人嘅另一半離世時，女人就要將手指上半部截肢，以表悲傷同哀悼。而佢地截肢亦唔會用先進嘅醫療設備，佢地只係用繩綁住隻手指，截肢後再用火燒止血，過程一啲都唔安全同衛生。
3. 食人（亞馬遜）
我地成日都覺得食同類好殘忍，但喺亞馬遜雅諾馬馬部落，佢地會食人類屍體，仲要唔止食肉，佢地會用各種方法，連骨頭都要碾碎飲埋，佢地相信咁樣可以令死者上天堂。
4. 大寶森節（印度）
大寶森節係虔誠印度教徒贖罪、奉獻同感恩的節日。要參與呢個慶典，懺悔者必須1個月前開始準備，嚴守戒律、禁慾同食素。而喺進行儀式前，所有懺悔者一定要接受寺廟祭司嘅訓誡，並進行24小時齋戒以淨化肉體同靈魂，佢地相信儀式進行時姆魯卡神會與佢地同在，令佢地完全感受唔到痛。
好喇，戲肉嚟喇！祭祀儀式有好多種，例如剃頭，做法事，用銀針刺穿舌頭、雙頰等，其中最突出嘅方法就係喺背部嵌入無數個小鐵鈎，每個鈎尾都綁住一條粗繩，由後面一人集中捉喺左手，牽扯拉緊，同時右手揮舞一條鞭不停鞭打驅趕前面嘅教徒。而家印度本土已經少見，但反而新加坡同馬來西亞就仲睇到。
圖片來源：網上
撰者：Kinnie
